Tua may imbagá nen pári Irene: say asunto ya nipaakar ed pangiletneg na eskuilaan a panbangatay salitay kastila ya abayag lan imparungtal, manasingger lan natutolán. Si Don Custodio, si makulin Don Custodio ya sankakulian lad amin day ponente ed tapew na dálin ya unong na kuanen Ben Zayb, aasikasoen to la, tan agewagew ton babasaen iray papipapil ya nipaakar ed sayan kanunotan, et nilabilabi met balet ya ougipan ton anggapoy napapaabig ton gaween; bangonan toy kaimbuasan, ugipan to lamet.....tan onia lan inagewagew so nagagawa. Alay mapalalon pankikimey tonian masegsegang a toon. sankakulian a ponente diad mundo! Say labay to komon anggapoy maomli ya napagustoan to ran amin,....saray papári, samay atagey a betang ya empliado, si sinyora condesa, si pári Irene tan say panagnunot ton díli ya malokak. Impanon tod kinen sinyor Pasta, tan anganggad ginawa to nia inelew tod karakel na simbawa to ran nansusumlangan tan ag onyari; intepet to met ed kinen Pepay a bailarina, tan si Pepay a bailarina ta agto amtay kakabaliksan, sinayawan ton tinelekan insan to kinereway duamplo tan limay pisos a pangipunpon tod panginaen ton aminlimá lan inatey a biglá, odino komaliman panginaen ton inatey a biglá, unong na andukerukey a paliwawa to, tan impasout to nimet ya impailoob ya assistant ed opisinay Obras Públicas so sakey a kapinsan ton makabasa, makasulat tan makatugtog na biolin, ya anggapo man ed sarayay akatulong kalamor ed Don Custodio ed pakanunot toy antoman a kaibad sikaton kaisipan.
____________________
1 Ponente Manangaral, manangipaliwawa tan manangiter na tutol ed bengat lan kruestion odino asunto. Singa bilang diad sakey a Junta ono Sing- batan, no walay resolbien ya kuestion, samay manrisalbi, sikatoy tawagey po. nente ton man a kuestion. Dia met bilang ed Corte Suprema (Supreme Court) ta labinsakey iray okum, no walay uksoyen dan tutolan ya asunto, sa- key ed sikaray mangaral tan mangiter na tutol; no kapakna ray ibiba ton okum so tutol ya inter to, abubonan ono conpirmaan da: say ponente ton man a
tutol ono sentencia samay nanggawa.
