anggaman anggapoy naimano ton lugan da, ta apasakey so
kanunotan tod Hongkong tan say pambilay tod kawayangan
tan panpayaman to.....
Ontaynan la lawari nen singa apasikmaran toy alajeron Simoun a manpapatánir ed sakey a toon sankaíli ya mansasalita rad ingles. Diad kinen Plácido, amin a salitan ikakana ra diad Pilipinas na taga Europa, no aliwan kastila anggapo lay arum no ag ingles; sakey ni singa to apatipatay salitan Hongkong.
No nayarian nen alajeron Simoun labat komon ya irekemendad samay sankaili ta ompikal angankon onarap ed Hongkong!
Tinmonday Plácido. Kabat to may alajero ta akakar lad man ed báley to ya nanlalakoy alajas.
Inibaan to ni ingen ed impanbaroy ton aminsan, tan si Simoun mababig so impatnag ton ugali to, ya tinotungtong to ni bilay ed saray Universidad ed saray bansan walad kawayangan: agay lay duma ed bilay dia!
Tinumbok nen Placidoy alajero.
"Sinyor Simoun, sinyor Simoun!" kuanto.
Kuanla nen alajeron onsapat ed luganan, et tinmonda nen abirbir toy Plácido.
"Labay ko komoy mikasi ed sikayo..... misalitan magano!" kuanto nia.
Apatnagan ed lupa nen Simoun so inalipanes to, et diad kaguguloy nunot nen Plácido, agto naimano. Diad antikey a salita tinungtong nen balolakí so agawa tan imparungtal toy pilalek ton yakar ed Hongkong.
"Antoy makasengeg ey?" kuay tepet nen Simoun a sankanengneng ton ag alisay matay Plácido ed talus ton may salming ton inanágan. Ag inmebat si Plácido. Tinmanguay Simoun, akaimis nimay imis ton amagamagá ya andi esel, tan inkuantod Plácido:
"Maong! Mila kayod siak. Diad lansangay Iris!" kuantod samay kotsiro.
Andi esel nen Simoun legay luganan a manbagtik a singa manmumurekdek na makabaliksan. Si Plácido ta aalagden ton pisalitaan da, agmet oneseesel tan natatalibagan mannenengneng na akamayamay iran manpapasiar a sasamboten day agaag na
