"Andibali, nasingil yo ran siansia."
"Bayal sikala? Ah, sigulo andi sikayo amta! No atalo sugal andi sikala bayal. Maong sikayo wala consul yo, sikayo. napasuot sikala, siak anggapon consul...."
Nengneng na mannunnunot si Simoun.
"No labay yo, intsik Quiroga," kuanton singa nababalang, "iter yod siak iratay recibo yo ta siak so akauley a maningil ed saratay opisial tan marinero ya akautang ed sikayo."
Si Quiroga ginapoan to lamet so maningel; tan kuanton agda iitday resibon balot.
"No laen da kayo sirin a pialaay kuarta, ibáki yo rad siak ta pian makaliktas kayo."
Misalsalamat a maong si intsik Quiroga. balet ta nagogunoyan ginapoan to lamet so pangababagey tod inkasikaton dili, ta anunotan to ra may pulsiras ya oliolíyen ton ibagay:
"Saman manggawa sigalilyo mas wala baing to!"
"Anto láya!" kuanen Simoun, ya paspasekiapan toy intsik na mata ya singa to iimanoen a maong; "nakaukolan ko nimet so kuarta tan iilalaon kon nabayaran yoak. Balet ta amin wa lay polaing to, ta agko met labay ya onlapog kayo ed satan labat ya andi kakabalik san. Nengneng yo, no tulongan yoak, bawasan koy duan liboy pisos itay siam a libon utang yo. Nilalabas yod aduana ya iloloob ed bansay amin a labay yo, kajon iran napnoy lampara, atep iran hierro, liplipong, kóbre. kuartan mamisos ya manlalapod México; sikayoy maniiter na armas ed saray konbinto?"
Mantanger si intsik, balet kuanto ta akamayamay so papalkapan to.
"Siak itel papali amin kaukolan da!"
"Nia ay," kuanen Simoun ed makalnan bosis; "nakaukolan koy tulong yo ya mangilabas ed aduana na pigaran kajoy pusil ya sinmabid sayan lábi.....tan labay ko met a yatol yo rad bodega yo; ag ira onoput ya amin dimad abong ko."
Nisegawan si Quiroga.
"Agkayo mapaga, anggapon balot so kaanoan yo; saratan a pusil kalkalnaan iran ibuyak a yamotamot ed pigaran abong, insan naani paunaan iray kaabongan, dakdakel iray naperiso.....sikayo tan siak pakalmoan tayo yan maong no tulongan tayo ra yan naperiso ed kabulos da .... natatalusan yo ak?"
