Akaimis si Simoun nimay imis ton amagamagá, tan kanengneng ton nitanlay intsik Quiroga, tinaynan to ra may komersianten mangidadalem na irap na linawa ra, tan inabet ton inlugay si araparapen a manconsul. Kanengnengto nia balet ed sikato, naandi may itsura ton nagnagnap, binmilunget so lupa ton pinmara ed saramay komersiante, tan angigalang ya intewek ton anggad balambang to!
Mapalaloy panamagalang nen intsik Quiroga ed kinen alajiro, aliwa labat lan lapod amta ton mayaman no ag nisesengeg met ed saray narerengelan ton pakayari tod kinen Kapitan General. Dengel ya si Simoun et tutulongan to may intsik ed saray pilalek to, maabobon ed pangiletneg na consuladoy intsik tan sakey a palapagan a kabusol to ray intsik, diad pipiebatan tod sakey a sangsangan ed sananey met a palapagan a makiling balet ed sarayan totoon nanbuek, aminpiga lan kinakalamit toy alajero ed saray sulsulat to, anggaman agto met bibitlaen malinlinew no agta ipapaspasikli to labat ed panangibagan masuliwet tan ag insumsumpal..... Wala ni ra ingey maalalwar a totoon mangibabalbalikas na agda met la isusumpal no agta panopanoan day pangikindat day matá ra, ya si Eminencia Ngra, a sakey yan impangingáran dad kinen alajero.... et ibabangat toy Kapitan General ya ikaná to ray intsik a pangimermer tan pamaabeba na kagalangan day indio.
"No diad panamatúlok ed sakey a bansá," kuanton aminsan," anggapo lay miparad pamaabebad sikato ya pati diad matá ton díli."
Ag abayag ed saya walay agawan akapangipasengegan.
Saray duaran togiop day mestizo tan naturales lawas iran mansisiiman tan manbabantayan, ya ipopongga ray kuli ra, paya nagnunot da tan pasang da ed pananginap dad sakey tan sakey ya anggapoy píyaen da. Sakey ya agew, diad misa, si kápitan da ray naturales ya mabmabeng, anta sipor a mapmaptek so yurong tod banko, linmad uló ton impansampalan to ray sali to ta pian lagi omposturay itsura to ya nengneng toy singa anggapoy walawalad sikaton ag mangitaltalek, tan piano ontabtabay pakanengneng ed saray olpó to, tan pangipangta to met lay balibali ran sapatos to. Si kápitan da met iray mestizo ya manyoryurong ed kaarap a banko, manlapod mapukel ya aliwaliway korte sali to tan agto ra napansampalan ta mata-
