kaili to, tan insipan tod saramay ag akarongod inmonan saklang ya mibansag ed sikaran mandem.
Si Simoun nandem lan sinmabí tan mitotungtong dimad salas ed pigaran komersianten mapalaloy keja rad itsuray kurang na komersio. Aliwan ami nagagawa, ag onggagalaw so komersio, tan atagtagey so panagsalat na kuarta ed Europa; ontetepet irad kinen alejero no antoy maong a gawaen odino ipappaabay dan ibagad sikatoy isisipen dan makanan gawaen ta agla pigá no ipasabi tod Kapitan General. Anggapo ta kapag polaing ya iparungtal dad sikato imimisan to ra labat na makababalaw tan masakit a panangibaga toy: "Ha! Kaam bagelan!" ya asabisabí lan diad ingungot na sakey et tinepeton malinlinew no anto sirin so walad uló to.
"Say walad ulók?" kuan met na tepet to, "aral yon omamengen no panoy ibobolaslas day arum iran bansá insan yo ra aligen."
"Tan akin et ombobolaslás ira, sinyor Simoun ey?" Sinintak nen Simoun iray abalá to tan ag inmebat. "Saray kimey ed doroongan day sakayan ya ontan lay pamapabelat dad komersio, tan saya lan lamang a doroongan ya ag nasumpal!" inngeswa nen Don Timoteo Pelaez, "manmamaliw lan abel nen Penelope, ya unong na kuanen anak ko, et ábelen, bagbagen.....saray babayaran a buis...."
"Wala ni ibaga yo!" kuay sakey, "natan nimet ya kadkayari nen Kapitan General ya ingganggan a bagbagen iran amin so kaabongan a sinigpit tan nanatep na pinaor! Insan kasabisabi na dakdakel a tagilako yon atep a hierro!"
"On," kuay ebat nen Don Timoteo; "et agyo amta labat no kaunongay gastos ko ed inakseb ton tan a ganggan! Insan, sakey ni, sakey bulan ni palabasen anggad pangigapoy panbagbag, pasabien ni mablin agew; tan nayarin diad satan et wala laray onsabin arum a hierro ya awit day arum iran sakayan.... Say labay ko komon gapoan lan tampol so bagbag, balet ta.... Tan sakey ni, panoy panaliw dad siak na hierro ran tay akanabong ey et nanpapara ran duká?
"Nayarian yon saliwey mamurmura ratay kaabongan da ay......
"Paisuner yo naani tay ganggan ay, insan yo lamet ira ilakod sikaray doble..... Baleg la tan a pakatuboan!"
