Tinmerak so pinaspasian tipak; amin manigsisia lara ed impakagamor day pilalek da tan say pamagalang ed sikaray Uley.
"Nunot yo labat, sinyores," kuanen Juanito, "ta sakey ak ed saray inmonaonan angigapó."
Bukor nen ag manilalon Pekson so ag masmasel.
"Maong lantí no say panginan dan pangipeketay pamagalang dad sikatayo et aliwan diad kalitkalit" kuanto.
Kapalpalaran nen Pelaez ta atabonan yan imbaga nen Pekson ed tanol na tipak. Nen apapas yay daiset, inkuan nen Pekson:
"Maong, maong, mababig, balet ta nayari met yan nagawa ay....panon bilang ta anggan akoen nin amin iratan et, ipasout nen General so mangipanon ed biek tan bick, insan kasumsumpalan to et agto iter so abuloy to ey?"
Singa ra kinalboay danum ya ambetel ed impakangel dad saya.
Ninengneng dan amin si Sandoval tan saya agagan ataatá.
"No antan...." kuanton manduarúa ya inmeremeré.
"No ontan, anto ey?"
"No ontan," kuanen Sandoval ta mansasbo ni liknaan to ed kasil tan bayag na nangel ton tipak, tan diad baleg a layap na linawa to, "bangta diad sulsulat tan ipapaakseb iran ganggan et ipapalapag tan ipaparungtal toy pilalek tod pakaaral yo, insan to balet sebelan tan ag yabuloy no asabi lay pankaukolan tan pankerew ed sikato, no ontan, sinyores, saray sagsagpot yo ag man ira naapá, ta diad satan agamoran yoy anggapo ni akagamor ya anggad natan a say pangekal yoy sanib na lupa to pian namuriay kalapágan so petepeteg ya inkasikato, tan say kapasout ton miarapan a mangitopak ed sikayoy guantes!"¹
"Satan, satan!" kuandan amin a maningal a napnoy liket na linawa.
"Maong so kanunotan nen Sandoval! Apaknaan mi tay guantes!" kuandan inarum na pigara.
___________
1 Nen saman iran panaon nen naugaliyan ni panbakal na duan katao no isisipey sakey ya apaunong ono nakalay galang, ta pian nipawil yan kagalangan, diad Europa ono America ta di guantes iray totoo, say pangibontok ano pangitopak na sakey a tooy guantes ed lupa na sakey met, kabaliksan toy balbaleg a panamabaing ya nakaukolan a manbakel iran manbakal.
