balet si pakaskasin sekretario manuwab a pinasia lay ingungot
to. Saman a kabuasan, unong na nagagawan inagewagew saray tatrabajoen to nipaakar ed kialis ono kaekal day empliados, kipaalis day totoo, kaperdona ray akagáway kasalanan tan
arum niran milublubayan ed saraya, ya agni adiwit so sankabalgan a kuestion a makasesengeg na baleg a kutengteng, a sa
lanti kerew day manaaral ed Ibale ya pangiabuloy ed sikaran
mangiletneg na eskuilaan a panaralay salitay kastila.
Wadman met irad salas a mamaspasiar tan mantotungtong a masaysayaksak, anggaman diad bosis a makalna, di Don Custodio, sakey ya atagey a betang ya empliado, tan sakey a párin ampoti ya tewek tan nengneng toy sinonunot ono ag napapaknaan; sikatoyay pári Fernandez. Dia balet ed kaabay a silir sankarengel iray bolan mantatankian, elek, pandak, tan say amagamagá tan marandanet a bosis nen Simoun a mibibilyar ed kinen Ben Zayb.
Kasanlilikna, inmalagey a biglay pári Camorra. "Si Cristoy misugal, puñales!" kuanton intopak toy duaran nipis a benbenbenan to ed uló nen pári Irene; "puñales! Anta sigsiguro lan bantak, natalo itayo nisesengeg ed inkalingo! Puñales, si Cristoy misugal!"
Tan diad petang na uló to ipapaliwawa toy aliwan inkasugal ed amin iray wadman ed salas lalo la ed saramay taloran mamaspasiar a mandadalem ed sikaran singa gagaween toran okum bilang. Manusugal si Kapitan General, sikato kokontraen to, si pári Irene walalay basas to; inarastre toy espada; insan, puñales! si langlang balet a pári Irene agto inbantak so alas to. Si Cristoy misugal! Si anak nen ina to ag diman linman betagen toy uló to ya andi kakanaan tan mangipataloy pilak to!
"Say isip lági manmúteg" kuanton intuloy ya ambalbalangay lupa to, "lalankapen koy kuartak odino tubotubo labat ed kakiyewan! Anta onggagapó lara nimet so indion ontatawal na babayaran ed simbaan!....."
Insan nguronguró ya agto inasikasoy panpapaliwawa nen pári Irene ya apaplosen to ngolay eleng to ed pangiamot toy pakakaimis to, tan tinmaynan lan linmad man ed silir a billaran.
"Pári Fernandez, labay yoy onyurong?" kuay tepet nen pári Sibyla
