Ing matwang e ra balung tanakan lilibut yang alang pake karing dalan.
Iti, ketang kayanaka'na, magaral ya sanang Filosojia dapot likwa’na uling penusiga'ne i'indu nang maki edad na, e uli ning kulang la gugulan o e na agyu ning buntuk na. Ali, nune uli na kabud ning mabandi ya pin at i'Tasiu naman sasabyan da maki tenakan ya. Ing malugud nang Indu pitakuta'nang nung mabyasa ya ing anak na pota kalingwa’ne ing Miglalang, inya pepamilina'ne king adwa; o magpari ya o lakwa’ne ing colegio ning San Jose. At ing metung a malsintang anti mo ya pinili na ing Iwal king colegio, at mekyasawa ya. Ala mang pepabanwa mengulila ya’t mebalu. Ba'nang ipaglimbang ing lugmang dimdam na ketang bye nang dilidili, dikil naming panaun na king pamamasang aklat, king sabung at’ menugali yang alang daraptan. Dakal ing panaun a dikil na king pamagaral nang sarili, minyali yang myayaliwang aklat. Pepabusta'na ing pibandya’na at iti yang mekapauli king pangakalulu na.
Ding taung maki pegaralan awsan deng Don Anastacio o Tasiung matenakan, dapot ding keraklan a e memagaral awsan deng Tasiu, ing kulang, pauli ning pamalak nang pagmumulalan at king uli ning e karaniwa'nang pamakipagsalita karing tau.
Anti mo ing asabi mi na, ketang gatpanapun a ita ating mamuk a bagyu. Ing kildap gugulisa’ne king maputla nang kislap ing banwang malulam. Ing angin pabigla ing pukul na at itang amyam a makiliwas makapangabala.
Ing matenakan a filosofo Tasio balamu akalingwa'na ne ing mal nang
bungu. Makatiman yang makatanga at lalawa’na ing lulam a matuling.
