Asalubunga'ne lele ning pisamban ing metung a lalaking maka chaquetang alpaca, mamitbit dakal a kandila at makabastun a maki borlas, tanda ning taung maki katungkulan.
"Balamu matula kayu?” nganing kinutang kaya.
"Tutu, Ginung Capitan, matula ku uling atin kung panenayan."
"Makanyan. ..? O nanu ya mo ing panayan yu. . .?”
"Ing bagyu...
"Ing bagyu...? Ba’kong mandilo.. .?" nganang manuksung kinutang ning gobernadorcillo at saka ne lalon ing imalan nang maluka ning matwa.
“Mandilu...? Bah! e marok, lalu na ngening makatisud kang basura. ..!” nganang mekibat alang kanlap at bilang pang pamanumis king kinutang. "Dapot atin ku pang panayan metung a bage lalung mayap. .."
"O nanu ya mo ita...?”
"Kildap a makamate at manduluk. . .! nganang mekibat e makikanu ning filosofo.
"Ba’t e yu pa adwan ing lumbug ne ing mabilug a sikluban...?”
"Ita ya pa ing bage kekatamu ngan, kekayu ampon kaku! Ikayu, ginung gobernadorcillo, darala yo reng kabuntun a kandilang menibat king tindahan intsik. Aku, ati’nang maygit apulung banwa ngeni, mumungkahi ku king balang bayung Capitan ing sali lang tukudbakal a paglaban king kildap dapot ila ngan kaylyan da ku at ing sasaliwan da pawang kwitis at bomba at babayaran da pa angga ing dupikal ding kumpana. Atin pa. Ikayu kabud, kabukasan, kaybat kung sinabi kekayu ing manikala ku, penibala yu karing pandayan ding intsik ing pangabubu na ning metung a kumpana king lagyu nang Santa Barbara kabang ikayu talus yung masala king ing katalinuhan (ciencia) atuklas nang mapanganib a tutu ing pamanigtig kumpana neng babagyu. Ngeni, sabyan yu na mo kako nung baket ketang banwang 70 inyang dig'pa ya ing duldul karin Binan ya kabud inagpa'na ing kampanaryu ning pisamban at pemisi ne ing relos saka ne ligpak ing altar? O nananu ya kanita ing kumpana nang Santa Barbara?"
Ketang penandit a ita mengildap.
“Jesus, Maria y Jose...! Kabanal-banalan a Santa
