"Nanung sangkan inaun ke? O nang male ku! Inutus da ku mu!”
“Ninu naman ing minutus keka?”
Ing bante minurung yang bagya at linawe ne babo't lalam ing kayabe na.
"Tau keka, balamu kastila ka. Yang kutang a yan ya naman ing kitang nang lihim kaku ning kastila at pakibatan da kang katulad ning pekibat ku kaya: inutus naku nitang matabang cura.”
"Ah! at nanu ing depatan mu king bangke kaybat?” nganang kinutang pa ning maselan.
"Dyablos, balamu wala kastila ka pin. Nung e ra ka kakilala at nung e ku balung metung kang lalake, awsan da na kasang kastilang civil. Kalupa na ka nitang metung. Balumo? Ing curang mataba pakutkut ne kaku king sementeryu ding intsik oneng ing kabaung mabayat ya at ing sementeryu ding intsik marayu ya. .
“Ali, aku, e naku talagang malyari, e naku byasang mangulkul pa.” nganang sinabat mipnung takut ning abe na. Binili ne ing pala na at likwa’ne ing aun. “Abangal ke itang bungu a pihung-pihu potang bengi e naku patudturan nyan..
Ginalapak ya ing bante inyang akit neng darayu at mangurus ing abe na.
Ing sementeryu kakatmu ne karing lalaki at babaing makapaldas. Ating mapilan a manintun karing aun ding lugal, misagsag la at ing balang metung siklod ya't mangadi ketang ukula'nang lugal a masalese. Deta namang ating pantyun karing mete ra sisindi lang kandila at taimtim lang mangadi. Ating mangisnawang saldak, ating sisiguk; ding aliwa pigagawan da mu, ding aliwa naman kukumpitan da pa. Damdaman mu naman ing bubulung dang orapreo, orapreiss at requiemaeternams.
Linub ya naman king sementeryu ing metung a matwang pandak. Ala yang kupya. Kabud ikit de ring atyu karin keylyan de ring keraklan at ding babai mengulurun la kile. E na pikabyang itang akakit nang daraptan da ring tatanud karing pantyun at aun. Sinulung ya at inaya’no ring makabuntun a bungu at siniklod yang balamu ating panintunan masipit karetang butul. Maingat nong inalis tunggal-tunggal ding bungu
