Maragul ya megastus bayu na telanan ing katungkula'na
dapot lalu namang maragul ing pakinabang a tatanggapa'na
uli ning katungkulan a yan.
O nung makanyan, ninu? Aliwa kaya ing Dyos?
Ay! aliwa ya! Ing mayap a Dyos e no babalisan a conciencia at sisiran a tudtud ding memalen. E no man pamatakutan at nung king mikatagun abanggit ne ning pari ing Dyos king sermun na, ngara namung mangisnawang saldak ding memalen: "O nung atin pin sanang metung a Dyos!” King mayap a Miglalang, ditak la mung makaganaka. Karen mung santu at santa mapagal no ring tau. Para karing memalen ing Dyos kalupa ra nya mu retang Aring padurutan da ring pinili nang luguran siping na. Ing balen kareting tawli karin nya mu daralung at manalig.
Ing balen San Diego mengari ya mo king Roma, aliwa ing Romang serula’na gilid ning malitun a Romulo inyang ipatalakad ne ing bakud a batu at aliwa ing Romang tinuki a mindilu king daya nang sarili at king daya ra ding aliwa kabang yutus neng mamintu ing mabilug a yatu karing batas a ipairal na, ali, aliwa ing Romang yan. Ing San Diego bayu yang Roma at king lugal da ring bantayug a marmol at mangaragul a pilalagen, atin ya namang bantayug a sawali at sabungan a inaptan pinaud. Ing cura ya ing peka-Papa ning Vaticano, ing alferez ning Guardia Civil ya mo ing Ari ning Italia king Quirinal, agyang makananu, agpang king degula’ning sawali at ning sabungan a pinaud. Keni at karin e tutuknang ing sigalutan pablasang ing balang metung buri na ginu ya at mipapaningaya la. Ngeni kaylangan ing mika kasalan iti inya ilarawan tamu ing uri na ning sikakatau.
I'Fray Bernardo Salvi ya itang anak at tahimik a franciscanong sinabi mi na king milabas. Ing ugali na at pamidapatdapat tutung makayaliwa kesa karing kapatad nang pari at lalu na king tikya'na, ing mapali buntuk a Padre Damaso. Payat ya, saluneru at parating mimisip. Malimit yang tutupad king tungkul nang anti mong pari at pakaingata'ne ing marangal nang lagyu. Pabulan pamu ibat king panyatang na, halus ding sabla mekianib no king "Venerable Orden Tercera” at iti pigkalungkuta’nang tutu ning kaligliga'nang kapisanan relihyoso, ing cofradia ning "Santisimo Rosario.” Ing
