Makalapit king pampang ning malating dayatdayatan,
ketang maliwalas a marangle at palayan karin
ya ing balen San Diego. Misasali yang asukal, abyas,
kape, prutas kilwal 6 pisasali nang tutung mura karing
intsik a magsamantala king kamangmangan da’t hilig
king sugal ding ortelano.
Ngening masala ing panaun ding anak ukyatan de itang pekamatas nang dake ning tungatung ning pisamban a penagawla'na ning lumut at ding kukulate tanaman. Manibat karin damdaman mong gugulisak mipnung sigla pauli ning legwa’na nitang akakit da king paligid. Busal da retang punggulpunggul a bubungan a inaptan pinaud, tisa, sim at kabonegro pilatan da ring mula at hardin ding sibabale, atuldu ne ning sikakatau ing sarili nang dampa, ing malati nang sale. Ing akakit da king misusumangid yang gagawan dang tanda anti mo ing metung a tanaman, ing sampaluk a mengalugus a bulung, ing ungut a memayutputan bunga a wawangis king dyosa Astarte Genetrix, o king dyosa Diana ning Efeso a maki susung dakal, o kaya ing metung a bukut a kwayan, ing luyus o metung a krus. Banda karin, atyu ing ilug a balamu wari metung yang maragul a bitin a maki katawan bubug at matudtud king dase nang berdi. Keni’t keta akit mu no man ding tumpuk-tumpuk a batung pakasalabat. Banda pa karin, lalati ya ing ilug, ketang pilatan da ring mingatbang pangpang a mangatas a nung nu la makakalawat ding dutung a pakalto yamut. Banda keni naman ding pangpang magbaba lang bagya at ken ya maliwalas ing ilug at ing agus na banayad. Karin, ketang makarayung gilid makatalakad ya ing metung a kubu. Balamu wari amunan na itang ketasan karin, ing angin
