Karing bansang mapali ing dalagitang labing atlu o labing apat panning banwa twa, dalaga ne bilang, nung makananung ing buku king misan mung bengi bulaklak ne kabukasan. Lub ning panaun a iting mipnung lihim at kapalsintan, king usuk na ning cura Binondo, linub de i'Maria Clara king beateryu ning Santa Catalina ba’nang pagaralan karin ing maigpit dang pamanuru ding madre. Tatangis, memun ya kang Fray Damaso at king bukud mung kakalugura’na ibat pa king malati ya, i’Crisostomo Ibarra. Iti naman kaybat menaliwa yang balen, minta ya Europa. Ketang conventung ita, nung maki-adwangan yang amanu kilwal, rehas lang bakal ding mamilatan kaya at tatanura'na ning bante madre. Tinuknang yang pitung banwa kilub ning kulungan a yan.
King ikakayap na ning balang panig at anti ning kamalayan da ing misasausig dang panamdam ding adwang kayanakan, pisangguni ra di Don Rafael at i’Capitan Tiago ing pamyasawa ra ding karelang anak at pikayari ra ing pamisanib da king pami-abyayan. Iti kaybat na ning mapilan a banwang pandayu nang Ibarra, at pigmasusyan da ring adwang pusung mikakandayu at é milulupa daralanan á bye.
