I'dara nang Isabel yang sinese king anak. Ya ing maganakang matwa a inanad ding fraile a ikit ta na king minuna. Halus pabanwa makatuknang ya San Diego uli ning masanting a panaun karin at uling madalas ing sayaha'nang Fray Damaso. E no ikwang Maria Clara ding mata nang malati ning pengari na. Anti mo i’indu na, maragul ya mata, matuling at paligiran da la ring makaba nang irap, masaya potang myalung ya, malungkut at migugunam ngening e ya titiman. Ketang malati ya, ing kulut nang bwak malare ya. Ing arung na matulid, é matilus é sapad. Ing asbuk na ipaganaka ne itang kang indu na, makawili at ating adwang puyu mingatbang pisngi. Ing balat a malino yang anti mong balat sibuyas at kasing puti ning bulak, kabang ding malati at masanting na ubug a balugbug, sasabyan ding kamaganak na, ikawa na no kang Capitang Tiago.
Agyang kang Tya Isabel na, itang bikas at tabas nang wawangis karing maputi pepauli namu ning pita nang Doha Pia inyang kakagli ya kang Maria Clara. Atatandana'nang ketang bye nang Doña Pia madalas neng akakit tatangis arap nang San Antonio. Ing metung nang pisan Tya Isabel makanyan ya naman a pamalak, itamu ping e la milulupa apiling santu. Para king pisan, nung aliwa ing Virgen, i’San Miguel. Ing metung a pilosopong pisa’nang Capitan Tiago a makibalung de memoria king Amat, panintuna’na naman ing kamalinawan kaniti king upaya ra ding batwin at planeta.
I’Maria Clara ya ing ligaya ra ding sabla, dinagul ya busal ning sigla at pakamal. Ding kabud fraile pamatulan de ngening gagayak de ba’yang tuki king limbun. Paymalanan deng maputi at ketang malabung at kulut nang bwak maka-ikat la ring sampagita at azucena, kabang makataid la king gulut nang baru ding adwang pakpak a kule pilak at gintu king gamat na at adwa no mang maputing pati-pati ding makataling asul a sinulad. Iti babye kaligayan at sigla kang Maria Clara kabang lalapo naman ing lugud na kayang Capitan Tiago inya e na balu nung makananu nong pasalamatan at puryan ding santu karin Obandu at yusuk na karing sabla ing sukat lang pagawa kareti kareta sang mangastanting a dukit.
