Lulub ya naman sana i’Basilio dapot makasusi ya
ing pasbul. Ing mamulang tutulak neng anggang binit
ing pasbul karing butul-balat nang takde at king buntuk nang gulgul a bwak e ne buring ibusni.
"Inang, aku ini . . . aku i’Basilio . . . aku ing anak mu . . ngana ning anak nang pakang na king pagal at miragsa ya.
Dapot ing mamulang e nya ring buring ibusni. Sisikad no ring adwa nang bitis king gabun at e ne buring ibili ing pasbul.
Durugduga'neng Basilio karing kamau na ing pasbul at king buntuk nang daraya. Tinangis ya, ala mu rin. Tinikdo yang magkakasakit, linawe ne ing batu at manintun yang aukyata'na dapot ala yang akit. Miglalawe ya king makapadurut at ikit ne ing metung nang sanga ning baliti a makabalibid king metung nang sanga ning dutung a kasiping na. Minukyat ya. Ing lugud ning penganak makagawa yang mala, at king pamaglipat na karing taid-taid a sanga, miras ya king baliti at adundunga'ne i’inang na tutulak ne pang anggang binit ing pasbul.
Ing kaluskus da ring sangang tutuklwa'na dimdam nang Sisa at tinalanga ya. Ikit ne i’Basilio, bisa ya sanang tumakas dapot i’Basilio linundag ya king gabun kinaul ne i’inang na at penuma na neng penuma at kaybat mibwal ya't milako male-tau.
I'Sisa ikit ne ing kanwa’nang mitmung daya. Dinuku ya at ding mata na balamu lulwa'la karing lulanan da. Kikilalana’ne ing anak na at ing malambat nang matudtud a uyat ning utak na mibalikwas la kabud atangala'ne itang lupang maputla, payat, salunan. Metung yang matinding kislap ing miklat king hibang nang pamisip, akilala ne ing anak na, ginulisak yang masikan at saka ne kinaul at penuma ing makatalanga’nang anak.
Ing indu at ing anak menatili lang alang kimut . . .
Inyang mimasmas ya i’Basilio ikit ne ing Indu ala yang male-tau. Inaus ne, penagurya'ne karing pelalung . malambis a lagyu at inyang apagumasda'nang e ya migigising at a ya mangisnawa, misdan ya, tinikdo yang malalagwa at milai ya king sapa. Sinaluk yang ditak a danum king kapirasung bulung sagin at saka ne besa
