I’Kapitan Tiago bina yang matula. King kekaba' niting makatakut a panaun alang metung mang minsing kaya: e re sinukul, e re kelilwa at biniling magdilidili, é re sigiran pangutnan e mu nanu dikil karing bage mangapalyari, e miparalan karing makinang elektrika, karing alang tugut a pamisoso bitis karing karinan lalam gabun, at aliwa pang pangit a kararaptanan a tutu rang balung daptan ding mapilan a taung sasabing memamagaral king sarili ra. Ding kakalugura'na, ngaku wari, ding meging kakalugura’na (pauli ning iting tau pepainggulut ne karing kakalugura’nang pilipinu ibat karing penandit a deta pigsalupsupa'no ning kapamahalan) memagbalik na la naman karing karelang pibalebale kaybat ding mapilan aldo bakasyon karing pibalebale ning kapamahalan. Ing Kapitan Heneral kabud inutus na ing palakwan do kareti pauli ning deti é la binang manapat manuknangan kareta, king maragul nang mwa ning putut a magnasang magmasaya karing daratang a pasku karetang manwanan a kakarinan.
I’Kapitan Tinong mibalik ya king kayang pibalebale masakit, maputla, mengalbag — ing pamaglimbang é mekakayap kaya at bina yang myaliwa, é sasabi nanu mang amanu, ni e no man pigayan ding kayang sapning kikyak, mayli, magsalita at mamulang king tula king pamibalik na. Ing kalulu e ne lulwal man bale ban é ya mipanganib makatabnu king metung a pilibusteru. Ing kabud pisan a Primitivo, kambe ning sabla rang kabyasnan ding makatwa, é ne abaklas king kayang pamagalang bulad.
"Panwalan mu ku, pisan,” nganang sasabi kaya, “nung é ko aduluk ding kekang papil, sinipit da ka Sana
