- Papamintu mu ing
- lub mu keti sulip!
Kabang matudtud la pa o magalmusal ding tau tamu, ya naman ngening pisabyan tamu i'Capitan Tiago.
Kapilan man e na ka ta pa inanyayang Capitan Tiago inya ala tang matulid o katungkulan ilati ta ya at ilele angga na king maulagang mangapalyari.
Mababa ya, malino balat, maragul ya pamikakatawan, mabilug ya lupa at itang taba na, agpang karing magmulala kaya, ambag na kaya ning banwa at ding kasalang na naman ngara itang taba na ya ing daya ra ding pakakalulu. I’Capitan Tiago anak ya lupa kesa king talagang idad na. Balamu atin ya pamung atlung pulu o atlung pulu’t limang banwa twa king panau’na niting kekatang salita. Ing malati at mabilug nang buntuk a makabalut king bwak a sidsad king katuling, makaba ya king arap at makuyad king gulut, dakal ya kanu laman ngarang sasabi. Ding mangalati nang mata dapot e na man singkit, e la mamaliwa bikas. Makinis ya arung at e sapad. Ing asbuk na, nung e ya sana mapanabaku at matalik mama malyari tamung sabyan at ilarawan masanting. Oneng potang mamama ya itang sapa na titipuna'na king metung nang pisngi at iti yang maka-itsura king lupa na. Matalik ya mang mama dapot maputi lang maputi ring ipa’na pati na ring adwang binili na namu ning dentista a binayad nang tya-labing adwang pesus balang metung.
Bibilang deng metung karing peka-mabandi ning Binondo at metung karing pelalung maragul a hasendero uli ning gabu’na Kapampangan at karin Laguna de Bay, lalu na king balen San Diego a nung nu na tatas
