Ing katahimikan likuba'na ing Menila. Ing sabla
matudtud nang anti mong ala. Mararamdam ing tulauk
ding manuk a makiliwas king bakting da ring relos
karing simboryu ring pisamban at king malungkut
nang kulait ning maynip a bante. Sinilip ya ing
kapirasu ning bulan. Ing sabla paynawa na, wa, ing kabud
Ibarra metudtud nya naman pauli na mekad ning malungkut
nang pamisip o pauli ning pagal na king pamaglayag.
Dapot ing paring franciscano a ikit tamung e kikimut at tahimik libutad ning sala, e ya matudtud. Magbante ya. Makapatung la ring siku na king pasamanu ning awang ning silid na at ing lupa na makasalale ya karing palad ding gamat na, lalawa'neng é bubulad ing metung a batwin a kikislap king dulum ning bengi. Ing batwin melabug ya’t mipda. Mewala mu naman ing ditak nang sala ning patubung bulan dapot ing fraile é ya metig king bili na. Lalawe vang marayu, nangan king alayang maka-ulas pa king dimla ning abak, king dane ning Bagumbayan, at king dagat a matudtud pa.
