I'Elias miglalawe ya king makapatulug. Marayu no king pampang. Ing aldo limbug ne at anti ning kareting karinan ing sisilim bina mung makuyad, migmula nang daralumdum, at ing bulan saslag ne king kayang kabilugan.
“Ginu,” nganang Elias king siwalang malangl, "darala ku ing siwala ring dakal a alang kalma."
"Ding alang kalma? Nanu ing buri yung sabyan?”
I'Elias sinabi na king makuyad a salita ing pisabi ra ning pamuntuk ding tulisan, liktawa’no ring kapikakunwa'na nita ampon ding kayang bala. Matingid neng pekirandaman Ibarra, at inyang mayari ing salita nang Elias, migari ing makabang katahimikan at kaybat nganang migsundung Ibarra:
"Ngeni nanu ing karelang pagnasan?”
"Maragul a kapanumanan king dake ra ding tapuk sandatahan, karing pari, king pangapalakad ning hustisya, king matulid a sabi, yadwan da ing paglalawe nang anti mong igpa ning kapamahalan.”
"Kapanumanan king makananung bage?"
"Alimbawa, dagdagan pa ing kagalangan king panandam ning tau, dagdagan pa ing kabitasan king kapayapa’ning balang tau, ditak pang kabawasan King tapuk sandatahan, ditak pang kabawasan karing upaya niting tapuk a binang mayan magpalalung gagamit karing mesabing kayupayan."
"Elias," nganang mekibat ning baintau, "e ku balu nung ninu ikayu, dapot daramdaman ku ing metung kong taung e makatalus king dapat nang lakad ning bye. Mimisip kayu at darapat makayaliwa karing dakal. Malyari yu kung austa nung sabyan ku kekayu ing nung tutu man king ing bili ring bagebage ngeni maki kamalyan, lalu na pa nung iti myaliwa. Malyari kong papanyabyan ding kakaluguran ku Madrid, bayaranan ku la, malyari kung makisabi king Kapitan Heneral, dapot deta man ala lang apalyari, ini ala yang ganap a upaya ban makaparapat dakal a pamanibayu, at aku é ku gawang nanu mang takbang keting bage, uling kakilala kung masala ing nung deting korporasyon relihyosa maki kamalyan la, detang kamalyan kaylangan la ngeni, ila pin ding awsan dang "marok a kaylangan."
