Bayu ya limbug ing aldo, i’lbarra sinake ya king bangka nang Elias king pampang ning kailugan. Ing baintau anti yang meligalig.
"Panupaya yu, ginu,” nganang malungkut Elias inyang akit ne. "Panupaya yung mangangas kung inawad kekayu iting pamitagun. Pignasan da kong pakisabyan timawa at pinili ke iting pamikatagun uling keti alang manakit kekatamu. Kilub ning metung a oras malyari ta nang mibalik.”
"Magkamali kayu, kakaluguran a Elias,” nganang mekibat Ibarra at magkapilit yang tiniman. "Idala yu ku ketang balen a akakit ta kampanaryu ibat keti. Ing kalma pipilita'na ku kaniti.”
"Ing kalma?”
Wa, isipan yung panyatang ku atupan ke ing alperes a magkapilit mamampang kaku king saup na. Akung mimisip kekayu at balu kung balu na kayu, ban alili ke, sinabi ku kaya king munta ku ketang balen a ita a nung nu ku manatiling patingapun, uling iti buri na kung puntalan bukas gatpanapun.”
"Pasalamatan ku kekayu iting kayapan a lub, dapot malyari yu namung sinabi kaya ing antabayanan da kayu,” nganang panatag mekibat Elias.
"Makanano? At ikayu?”
“Malyaring e na ku akilala, uling king bukud mung ukdu a nung kapila'na ku ikit é na isipan ing makayabe ku.”
"Maka malas ku!” nganang mengisnawang saldak Ibarrang mimisip kang Maria Clara. "Nanu ing sabyan yu kanaku?”
