Makaba lang aldo at mangalungkut a bengi ring linabas king masakit. I'Maria Clara mika benat ya kaybat nang migkumpisal, at king kekaba'ning kayang hibang a pamagsalitang dili na, ala yang sasabyan nune mu ing lagyu ning kayang indung e na ikwang abalu. Dapot ding kakalugura’na, ing kayang igpa ampon ing kayang dara magbante la. Parala lang misa at limus karing sablang larawan a milagrosa. Ing Kapitan Tiago mengaku yang magregalung metung a bastun king Virgen de Antipolo, at bandang tawli ing lagnat migmulang mibabang makakalale.
Ing doktor De Espadana migmulala ya karing kayapa'ning jarabe de altea ampon ing pangasadya ning lignen, panulung e na babayu. I’Donya Victorina bina yang matula king kayang asawa, inya misan a aldo a iti adamusak ne ing kola ning kayang bata, e ne ginamit ing kayang kodigong pamarusa a ilako ne sana ipan, menagyu na mung sinabi na kaya ing:
"Nung e ka mepile dalpakan mu angga ing kakung corse !”
At iti e ne man gagamitan !
Misan a gatpanapun, kabang i'Sinang at i’Victoria yapa re ing karelang kakaluguran, mipagsalita la kabang magminindal king komedor, ing kura, i’Kapitan Tiago ampon ing sapni nang Donya Victorina.
"Panandaman kung tutu," nganang manyabi ning doktor, "ing Padre Damaso panandama’na namang ma ragul."
"At nu karin ing sasabyan yung ilipat de?” nga nang kinutang Linares king kura. "King lalawigan Tayabas!” nganang halus e may bug manyabi niti.
