king siwalang magmalun “Dapot karing adwang marok,
ita nang e bina.”
At tinas na ing siwala, linapit ya kang Linares.
"'Me keni, anak,” ngana, "pakisabyan te i’Santiago.."
I'Linares menimutla ya at magpataguyud king paring lalakad malalam a isipan.
Kanita i’Padre Salvi ya naman ing miglakadlakad, misipisip anti mo ing sadya.
Ing metung a siwalang babye mayap a aldo kaya tiknang ne king alang kapupunta'nang lakad. Inatna ne ing buntuk na at ikit ne i’Lucas, at iti pupugaya’neng mitmung pamagkumbaba.
“Nanu ing buri mu?” ngarang kukutang ding mata ning kura.
“Padre, aku ing kapatad nitang mete ketang kayaldawa'ning pyesta!” nganang mekibat king siwalang halus kikyak Lucas.
I'Padre Salvi minurung ya.
"At, ngeni?” ngana king siwalang halus e marandam.
I’Lucas magkapilit yang kyak at kukuskusa’no ring mata na king kayang panyu.
“Padre,” nganang kikyak manyabi, “minta ku king bale ri Don Crisostomo ban manyawad kabayaran... primeru pemaldak na ku, sasabing e bisang mamayad nanu man pablasang mipanganib yang mate mu naman pauli ning kaluguran ku't alang kalmang kapatad. Napun mibali'ku ban pakisabyan ke, dapot minta ne Menila, likwa’no kanaku, anti mong limus, ding limang dalan a pesus at penabili'nang e na ku babalik—kapilan man! Ah, padre, limang dalan a pesus, ah! padre. . .”
Ing kura, inyang magmula yang magsalita, pagumasda’neng magmulala at matingid, at makakalale milarawan karing kayang labi ing metung a timan a mitmung pamalkara arapa’nitang kumidya, a nung i’Lucas ikit na, tinakas ya sanang misnang salusu.
“At nanu ing buri mu ngeni?” nganang kinutang ginulut kaya.
"Ay! Padre, sabyan yu kaku king lugud ning Dyos nung nanu ing dapat kung daptan; ing pari agyang kapilan babye yang mangayap a usuk.”
