Inyang mipayapa nong ditak ding malda at abalu ra ing meging sangkan ning kagulwan, ding sabla mwa la. Pemasibas dong batu ring gwardya sibil a darala ra ding pulis, at ating mapilan a minalak silaban de ing kwartil at saka ro dulukan i'Donya Consolacion ampon ing alperes.
"Kanyan. . . kanyan la matinu!” nganang gugulisak ning metung a babaing maglislis takde baru at yasiwas no ring gamat na. “Gawang kagulwan king balen! Ala lang balung alinlanganan nune ring taung marangal! O reta ring tulisan at sugarol! Silaban ta ya ing kwartil!”
Ing metung a katau sasalata’ne ing takde na at bisa yang magkumpisal. Siwalang makalunus ing manibat lalam ding bangkung makatwag. Metung ya pala karing musikus. Ing entabladu mitmu ya karing artista ampon taung memalen a sasabing agnan-agnan.
Atyu karin i’Chananay at makagani ya pang Leonor king lage na king Trovador at magsalita ya king amanung palengki at kasabi ne i'Ratia a makagani namang guru king pipagaralan. I'Yegeng man a makatibabal king malapad nang panyung sutla abe ne ing Prinsipe Villardo. I’Balbinu at ding morus pamatulan do ring musikus a mengapanasakit king kagulwan. Ding mapilan a kastila, munta la keni at keta, magsalita at aralan do ring balang atagpwan da.
Deti ikwa rang mekatatag tapuk da. I'Don Filipo balu na ing kapagnasan da reti inya agad nong inambanganan.
"E yu alinlanganan ing kapayapan ding memalen!” nganang migsalitang masikan. "Bukas a bukas manyawad tamung kamalinawan king dapat da ! Sukat dang kilalanan ing matulid! Akung makibat king ing katuliran mibye kekatamu!”
“Ali!” ngara ring mapilan. “Karin man Kalamba depatan da na yan. Pengaku ra na mang lunto ing matulid, dapot ing Alkalde ala yang depatan agyang nanu! Dap tan mi karing gamat mi ing katuliran! Tara king kwartil!”
E re pakiramdaman ing tininti mayul. Ding taung mipulung na susulung no sana. I’Don Filipo maliswas ya at manintun yang taung makasaup kaya. Ikit ne i’lbarra.
