"Nung makanyan saupa’na ka ning Dyos,” ngana ning matwa at mako ne sana.
“E na ko manalbe. . .?”
"Salamat! Ban maninap at gawang kamulangan, aku nang dili ku,” nganang mekibat maki sunu ning pilosopo. "Aganaka ku pala, é ka mayayaus a pansing king ugali ning balen tamo? Payapa ya dapot maburi ya keng palage maki labanan, keng madayang patayan. Buri na ing pamipante-pante dapot sasamba yang aryan at prinsipi. Banal ya dapot magpakalipit ya king payalbe king kasalpantayanan. Ding babai ning lahi atin lang mayubung panugali dapot potang akit deng mamasiwas espada ing metung a prinsesa king kumidya, kakatmu la king tula. Balu mu ing makapauli kanite? Yang...”
Ing panyatang nang Maria Clara at ding kakalugura'na pinutut na ing pamisabi ra. I’Don Filipo selubunga’na la at tiki no karing makasadya rang luklukan. King gulut da makatuki ya ing metung a kura at metung pang pransiskano at mapilan a kastila. Kayantabe ring pari makatuki la ring mapilan a kataung mamagape karela.
"Keta man sang aliwang bye parangala’no ning Dyos,” nganing matwa, saka ne dinayu.
Ing palage pigmulan de ri Chananay at i'Marianito king Crispino e la Comare. Makiramdam la ngan at matulid a panlalawe king entablado ring tau, subali king metung a tau: I'Padre Salvi. Balamu wari é ya mine karin ban manalbe nune ba’nya mung banten i'Maria Clara. Ketang lungkut na lalu yang lalagu at maging mahalan inya e pagmulalan nung ding sabla mabibihag la kaya. Dapot ding mata ning paring pransiskanu a sasalikut ding talukab dang malalam, é la manakit legwan a pagmulalan, nune ketang madalumdum nang panimanman ababasa mu ing alapg lunas a kalungkutan. Karetang matang deta malyari yang maglalawe i'Cain ibat man king marayu at imbuta’ne ing Paraiso a lerawa’nang mipnung sigla at samyu ning kayang Indu!
Mapupus ne ing metung a dela ning palage inyang datang ya i’lbarra. Inyang akit de meramdam ing bulungan. Linawe re ngan at kaybat ing kura.
