Kaybat, sera ne ing pasbul, sinusi ne at sake ne lepitan ing asawa na.
"Talagang ika panintunan mu ing aryan daka...!” ngana at sikmal no ring gamat na.
"Ninanu ka. . .?” nganang kinutang ning babai. Tinikdo ya’t mumurung.
“Ninanu ko?” nganang ginulisak ning lalaki at saka ya menagkas. Pepakit ne ing kapirasung papil a purus mantsa at nganang tinuglung:
“E me pepadala king Alkalde ing sulat a ine a nung nu mu sasabyan king susuhulan daku inya payntulutan ku ing sugal, e map a.. .? E ku balu ba’t e ra ka sakalan a batal!”
“Ale na mo! Lon ku pin nung arapat mu!” nganang magsisting mayli. Ing makasakal batal kaku kaylangan ing migit ya pangalalaki keka!”
Dimdam ning alperes ing masakit a sinabi na dapot ikit ne ing latiku. Sigmit ne ing pinggan babo ning mesa at besibas ne king buntuk na. Ing babai, pablasang sane ne king anti kaniting labanan, maliksi yang dinuku at ing pinggan digpa ya king dalig. Makanyan mu naman ing milyari king silyo at kutsilyung besibas na.
"A dwag! Ba’t é ka lumapit?” Lira’ne at kaniti miralakdak yang lalu. Medalumdum ya ikit, mikasbu neng lindagan dapot ing babai king makapagmulalang bilis na, apangilaga'ne at saka ne siblenan a lupa king latiku, kaybat milai ya king silid at saka ne biglang sera. Tegal ne ning alperes dapot e ne inabutan at kasusi ning pasbul minuran makatakut a palmura.
"Babaing marok a pipumpunan! Ibusni me ing pasbul nung ali balbalan daka lupa.” Gugulisak kayabe ning dugdug da't paldak ding gamat na't bitis king makasusing pasbul.
I’Donya Consolacion e ya makibat, dapot daramdama'no ning alperes ding miguguyud a tabureti, baul at aliwang kasangkapan bale a maging panyagkang masikan king pasbul. Kukulug ya ing bale king paldak at panagkas ning asawa.
"E ka lulub, é ka lulub!” nganang gugulisak ning babai. “Ustung ikit da kang sinilip, barilan daka!”
