I’Donya Consolacion a labandera pa mu kanita, selat ne ing bukul a pepasari ning koti, nganang minulit bista man sasawa ne king kau-ulit:
"Fe. .. lipe, Felipe. .. nas, Felipenas, makanyan?”
Mematwin ya ikit ing kabu. O'bat meging Felipenas ya lugal king Felipinas? Isanu king adwa: o Felipenas ya pin at ibat ya king lagyung Felipe?
Itang aldo ita binalak ning kabu ing magtahimik pa mu. Likwa'ne ing asawa na linawe nong mayap ding kasulatan. Inyang abasa na la lalu yang mengapamulala. Kisut no ring mata na. “Manaya na ka... makakalale. .! Ding sablang kasulatan sasabyan dang masala Fitipinas. Nung makanyan, ya at ing asawa na mali la.
"Ba't makanyan?” nganang bubulung. "Maglaram ya wari ing Historia? E na sasabyan ning aklat a ini king i’Alonso Saavedra binye ne ing lagyung iti king bansang iti bilang parangal king principe Don Felipe? O’bat sinira re ing lagyung yan? Pota galang metung yang indyu i’Alonso Saavedra?”
Ba’nang amalino ing kapikakunwa'na kaniti, pintala'ne ing Sarhento Gomez, a ketang anak ya pa bisa ya sanang mag-pari. Ini naman, e ne linawe man, kaybat nang pepasulapo asuk, nganang mekibat mitmung kayabangan:
"Ketang minuna, Filipi ing yaus da lugal a Felipe. Ikami, kaniting bayung panaun, pablasang makahilig kami king salitang francis, é mi apibatang damdaman ing mituki la ring adwang i. Uli niti ding taung megaral karin Madrid lalu na — ibat na ka Madred? — ding taung byasa, ngaku pin, magmula ra nang yagkas ing: menistro, enritacidn, embitacion, endino at aliwa pa. At yan ya pin ing awsan dang: tuki ka king bayung palakad.
Ing kalulung kabu e ya miras Madrid inya pin e na amalino ing kapikakunwa’na. Karakal mu pala abalu Madred!
"E kasi pala ngeni dapat meng sabyan...?”
"Tukyan mu ing sadya, ing bansang iti ala ya pang balu... ing sadya: Filipinas!” nganang mekibat maki kalibakan Gomez.
Nung e ya man matinu king pamagsalita ing al-
