"Ay.. .! aliwa kong aliwa pamalak,’' nganang mengasdan Kapitana Tinay at saka no pidaup ding gamat na. "Balamu é ko migkasakit inyang ibait yo ding kambal yu...!" "King uli na pin kabud nyang kasakitan a delanan ku karela. . . Pigkasakitan kong beit, sinese at pepagaral busal ning kalukan mi, inya é ku tulang kaybat ning kaskupan kung delanan king uli ra dagul la pang kapitna mu pangalalaki. .
"Balamu é yo kaluguran ding anak yung agpang king utus ning Dyos," nganang minyabing maki palsala ning Hermana Rufa.
"Ipanupaya yu. . . E la milupalupa pamanlugud ding Indu karing karelang anak. Ating Indung ing lugud da karing anak da para karela mung sarili, atin namang ing lugud pauli ning anak da la at ding aliwa naman ing pakamal da karing anak ya sana ing mipakayap la reti. .. Kareting tawli karin ku makabilang uling iti ya ing tiru na kakung Ibpa ra. . .”
"Yang anggang pamalak ya, Kapitana Maria, é makayakma king banal a kasalpantayanan,” nganang balamu manaral Hermana Rufa. "Ing masanting lungub kong Hermana ning Santisimo Rosario, ning San Francisco, ning Santa Rita 6 kaya ning Santa Clara!”
"Hermana Rufa, potang akilala kung makabage na kung maging kapatad ding tau, kanita pagpilitan ku ing maging kapatad da naku naman ding santu!” nganang mekibat makatiman.
Lakwan tana iting myayaliwang pamalak a abalu tamu at ayan ta no man layun pakiramdaman a sasabyan ding talapagobra king marangle a makapulung lalam nitang tolda king kabalenan at kareti kabilang ya ing kakilala ta nang bisang mika anak a doktor.
"Ing lalu kung panamdaman,” ngana niti, "king uli ning milyari e ne misundung mitalakad ing pipagaralan. ..!”
"Makanano, nanu ngamo?” ngarang kinutang ding makatipun a tutung maibug makabalung agad.
"Ing ana'ku e ne makapag-doktor, Iwal nyang mamalis dalan! Ala, e tana mika eskwela. ..!”
“Ninung sinabing e tana mika eskwela?” nganang kinutang ning metung a magbubukid a maragul a katawan, malapad a sikang at malati buntuk.
