tung anti mo king aske patipati, o kaya king laman
king aske ning metung a lingo prayle. Urne na neng
pagmulan ing aral king tagalug.
Ing matwang babaing mapangadi myuma’neng timpa ing kayang apung babai a migising makangisngis at nganang kinuiang:
"Oras ku nang kyak?”
"Ali pa, dapot e ka matudtud, buyset!” nganang mekibat ning mayap a impu.
King kadwa nang dake ning aral, o kaya king tagalug, ala kami nune mu dake mangakuyad. Ing Padre Damaso manyabi yang alang pamisadya keting salita, e uli ning makapanyabi yang lalung masalese kaniti, nune pauli ning bibilang nong alang male king masalese pamagsalita ding pilipinu karing lalawigan, e ya migaganakang makagawang dakal a kamalyan arapan da. Arapan ding espanyol aliwa nang bage: mekarandam yang pamisabi dikil karing tuntunan king pamagtalumpati, at karing kayang talapakirandam malyaring ating memanibat karing pipagaralan, mekad ing Ginung Alkalde Mayor; uli niti susulat no ring kayang aral, umanan, lilisu at kaybat tatandanan at sasane mapilan aldo bayu no panaral.
Metung a bage pikabalwan king ala ninu man karing tinagun ing mekatalus king kabiluga’ning aral: bina lang mapurul a pamanaluki at ing manaral bina yang malalam, anti mo ing sasabya’nang Hermana Rufa, inya ding mekirandam mealang ulaga ing pamanaya rang pamikatagun ban kyak, at ing buysit a apu ning matwang kosyang myuman yang metudtud.
Makanyan man iting dake mika pasari yang igit pa king minuna, karin mu mang mapilan a makirandam, anti mo ing ikit tamu king makatuki.
Migmula ya king "Mana kapatir kon kristyano” a nung kaysanu la sinalisi ring tukituking pangamanung é malyaring dinan masalese kabaldugan; migsalita ya dikil king kaladwa, king impyerno, king “mahal na santo pintakasi", karing makasalanan a indyo at karing banal a paring pransiskano.
"Menche!” ngana ning metung karing adwang alang galang a taga-Menila king kayang kayabe; ita griegu na para kaku, mako na ku.
