"Uli niti pupugayan da ka, matalino Diego, dangala’ning kekatang kapisanan! Ika ganap ka king kayapan, mahinhin a maki dangalan, mababang makikasugyan; mapanusig a makitetagan; banayad a maki matas a kapanayan; kasalang a maki kasugyan; mapaglunus a maki pamamatawad; banal a makipamigaganaka; talasalpantayang maki katapatan; mapaniwalang maki katapatan; malinis a maki kapalsintan; tahimik a maki lihim; mapanandaman a maki pamibabata; matapang a maki takut; mapamigil a maki sikanan lub; mapangangas a maki pamibalakbalak; mapamintung maki pamamigil; malamarine maki pamagmaragul; masikap a maki pamagkalam ; byasang maki kagiwan; magalang a maki tuntunan; matalino maki pamaningid; mapamakalulung maki lunus; malihim a maki kahinhinan ; mapamaling maki tepangan ; malukang maki pamagbage; malam a maki pamagtipid; masipag a maki pamagpabusta; matipid a maki pamagkalam ; alang malit a makatalus; mapanuman a maki pamikakayagpang; alang pamagmasabal a maung makabalu: ing Dyos lelanga’na ka ban lasan mu ing yumu ning sinta king pamisip . . . ! Saupan mu kung gumale karing kekang degulan at king kekang lagyung matas pa karing batwin at masala pa king kabud aldo a tutulug karing kekang bitis! Saupan yu ku, ikayu, yadwan king Dyos ing ganap a sala king kapamilata’ riing pamangadi king 'Ba pu Maria!”
Ding sabla siniklaud la a peparandam king melung a bwang a anti mo ing byung ding libung tatabwan. Ing alkalde magkakasakit neng siniklaud ing kayang tud, at piling mwa ing kayang buntuk; ing alperes maputla ya at sisisi.
“Ibye ya king demonyu ing kura!” nganang bubulung ning metung karing adwang kayanakan a ibat Menila.
"Tahimi'ka!” ngana ning metung, dandama’na kata ning babai na . . ."
Kabang malilyari ita, ing Padre Damaso, king karinan a pangadya'ne ing Ba pu Maria, pilmura'ne ing kayang espiritu santo pauli ning iti liktwa’no ring atlu karing mayap diling parapo ning kayang panaral; kinanwa yang adwang merengge at metung a basung Malaga, bitasang mika mayap a diwa kareti kesa karing sablang espiritu santo, deti megawa la man king du-
