murung at pasitalakad — iting sabla bista't e makayabe
king tyuntyu’na ning pista, metung mu namang pyalben, alang
bayad at binang pangangawilyan.
Ing Hermano Mayor niting aldo mitubud yang mananyaya karing dalan anti mo itang migpistang sasabya'na ning Evangelio mamilit na ban minum suklati, kape, tsa, mayumu, at aliwa pa. Ing anyaya mumuli nang paginakit.
Ume ra nang pagmulan ing misang karagulan, ing misang awsan dang dalmatika, anti mo itang sasabya’ na napun ning mapyang corresponsal, ya mu itang ngeni ing magmisa ya ing Padre Salvi, at kambe ning taung makiramdam datang ya ing Alkalde ning lalawigan kambe ring dakal a espanyol at taung ilustrado ban pakiramdaman de ing Padre Damaso a binang bulalag king lalawigan. Ing alperes man, manamdaman pa karing panaral nang Padre Salvi, datang ya naman ban munye pang kausta’ning kayapa'na pilubluban at mibalag nung malyari karing maligalig a penandit a pepasari na kaya ning kura. Makanyan yang kabalitan ing Padre Damaso, inya ing corresponsal sinulat na nang makapauna king talapatuntun ning pahayagan ing anti kanini:
"Anti mo ing pepabalu ku na kekayu karing marok a pangasulat kung telatag napun, makanyan ing milyari. Mikayatin kaming makapasubaling tulang mekiramdam king kabanalbanalan a Padre Damaso Verdolagas, matwa nang kura niting balen, a milipat ngeni king lalu pang maragul anti mong galal ning mangayap nang kasuywan. Ing marangal at banal a orador ligala’ne ing pulpitu ning Espiritu Santo at pepawaga ne ing metung a misnang kayap at kalalam a panaral a pepamulat at pepagmulala karing dakal a talasalpantayang binang maung manakit manibat karing magalasgas nang labi ing makakayap nang sibul ning alang anggang bye. Kalalaman ding pamisip, tepanga'ning pamibalak, paninibaywan a pamangamanu, legwa'ning panaske, kayan king pangimut, nayun king pamangamanu, katalinuhan ding pamalak, ati’lu keti ring kayapa'na ning Bossuet a espanyol nune angga pa karing magaspang a indyo ampon ding tosung anak ning Impyeryo ning Banwa.
Makanyan man, ing binang manalig a corresponsal bigsu nyamu mepilit alila’na ing kayang sinulat. Ing
