King bale nang Capitan Tiago maragul mu naman ing tau. Kakilala ta ne ing maki bale. Maburi ya king sigla at ing pagmaragul nang ya tau ya Menila, sukat nang pakipaltawan, ita sanang ding provinciano marayu lang marayu king sablang sidya na. Metung pang sangkan a minilit kayang palabisa’na ing atyu keta kaya, ya kabud ing anak na, i’Maria Clara at ati'yu naman karin ing payntungul nang manuyang a meging laman dang asbuk ding tau.
Ing metung karing gagalangan dang pahayagan Menila mitagulaling yang metung a lathala (articulo) para kaya king mumuna nang pisngi a maki pamuntuk, "Maki tulad ko kaya!” a nung nu re pupuryan at didinan usuk. Inaus deng ing pantas a bayatau at makwalta." Anti murin ing matikding mapanyapat mayap . . . katuki na pa ayan nganing pahayagan : Ing tiru (alumno) nang Minerva a miglakbe king Indung Balen* ba’neng pugayan ing tune labwad ning arte at ciencia, at bandang lalam pa ing pilipinung kastila, at aliwa pa. I’Capitan Tiagu man buri neng tutung apusan, malaus aisip nang patalakad ya tang metung a kumbintu.
Bayu pa datang ing pista mipadala no king tuknanga'nang Maria Clara at Tya Isabel ding dakal a kahun a pamangan at alak a menibat Europa, salamin a mikakaragul, cuadru, at ing pyanu nang Maria Clara.
Itang kabisperasan karin ya dinatang i’Capitan Tiagu. Inyang salubung ya’t mumang gamat ing anak na, dinina’neng gintung kwintas a maki medalyun a pepatulugan dyamanti at esmeralda at kilub ning me dalyun makalulan ya ing kapirasung dutung a mekwa ketang bangkang sekya’nang San Pedro inyang ing Ginu tang Jesucristo kayabe reng darakap asan.
