lingwan, at nung inya mu e ku pamali ing pangamate
na pauli na mu ning malinis nang lagyu ning Relihyon !”
Ing matwang matenakan beba ne ing buntuk na.
“Ginung Ibarra," nganang makakalale; "nung ikayu sisinup yu iting mepalyari, katandanan a e ku malyaring pakalingwan kekayu, gulutan yu na ing kekong tangka at panintunan yu king aliwang lugal ing ikakayap ding kekong kabalen. Yang kekong tangka mamita yang aliwang tau pablasang king pangabalayu’na e mu bukud kaylangan ing ating gugulan at nais dapat keting balen tamu kaylangan mu naman ing kusang paypagkasakit ing maragul a pamagkapilit ampon pamaniwala, pablasang ing gabun e pa makasadva, ing keti makatanam pawa pamung talahib."
Talus nang Ibarra ing ulaga reting amanu dapot e ya dapat masira lub; ing kapigaganakan kang Maria Clara atyu king kayang isip; Kaylangan a tutu ing arapat na ing kayang inampang.
"Alang asangguni ing kekong sibukan nune mu iting mabayat a paralan?” nganang malale kinutang.
Ing matwa telana'ne gamat at tiki ne king awang. Ing marimlang amyam a manibat pangulu tityup; karing kanimanman na makalantad ya ing hardin a mapupupus king malapad a pulung magagamit anti mong parke.
"Baket e tamu daptan ing darapta'na nyang maynang tangke a mitmung bulaklak at buku?” ngana ning matenakan at tutuldwa’ne ing malagung rosal. "Ing angin tityup, tutuguna’ne, at iti duruku ya ba’nong ipangilag ing darala nang maulaga. Nung ing tangke manatili yang matulid, mapakli ya, ing angin isambulat no ring bulaklak at ding buku malanat la mu. Ing angin lumabas mu at ing tangke myuman yang talakad, magmaragul king kayang maulagang pibandyan. Ninung mamalsala kaya nung dinuku ya man pauli ning kaylangan? Oyta, akakit ye itang misnang katas a kupang, a mapagmaragul myagwag king maya'nang sanga a nung nu ya magsale ing agila? Inyang kinwa ke king pulu metung ya mung malating tanaman; ing kayang malating pun pepayalale ke karing mangalating patpat lub ning mapilan bulan. Nung kinwa keng maragul na at malabung, abibitasa kung e mebye keti: ing angin digsa na ne sana bayu ring yamut na mika-
