ngalalu, aku nang balang magbante at e na ku akit."
“O makananu mung daptan. . .? Makananu, pakyapusan me ing Madre Mapakiramdam (Sor Escucha) ...?” Ginalapak la kaniti uling aganaka ra itang bye ra king colegio.
“Balu mu naman nung makananu tayang alilinlang ing Madre Mapakiramdam (Sor Escucha).”
Ibat ketang pisalikuta’na, ikit nong Padre Salvi i'Maria Clara, i’Victoria at i’Sinang lilitawan de ing sapa. Ding atlu lalon de ing salamin ning danum at panintunan de ing palaysipan (misterioso) á sale. Mabasa angga king tud at itang pilegis ning malwalas dang nagwas á pandilu, lalarawan da king kaysipan detang mabikas dang butit. Makasalbag la bwak, lubas la takde at ma kakamisa lang malwalas á maki gulis a masigla. Ding atlu kabang mayntun lang alang payntunan, managtal lang bulaklak at gule king pangpang ning sapa.
Ing paring Acteon, pagumasdan neng manimutla at alang imik ing malinang a Diana. Ding mangamulagat nang matang kikintab ketang madalumdum dang pagsalayan e la sasawang manakit karetang maputi at lelika'nang takde, ketang gilita’nang batal á nung nu ya magmula ing manuksu nang salu, detang malati at malare nang bitis a mamyalungan king danum, gigisingan da ketang payat nang katawan ing panandaman a bayu kaya at yagkat deng maninap bayung yatu itang malibub nang pamisip. Ketang metung nang salingku ning sapa a sasalikut da ring kwayan a malabung mipampan la ring atlung malagung dalaga at e na meram’ dam itang mangasalpak dang biru.
Melasing ketang ikit na, mikakunu, tutulu pawas, meko ya i'Padre Salvi ketang pisalikuta’na at miglalawe ya misusumangid mangaralangat a mata. Tinigil yang bigla, mikakunu. Dinalung yang mapilan a katakbangan at maybug nong tukyan ding dalaga, dapot e na belayun at migbalik ya. Memebe ya king sapa at penintun no ring mag-piknik.
Malapit karin ikit ne libutad ning sapa ing lugal a makakulung anti mong pipandilwan at maki bubung yang kwayan. Ibat ketang pipandilwan daramdama’na ing masayang siwalang babai. Iting pipandilwan makagayak yang mangalapad a bulung tanaman, sampaga at sabit-sabit a banderilya. Banda karin menakit yang tete kwayan at makarayu kaniti ikit no ring mandilung
