misangkanan menako? Ding guardia civil e la tau, kabud
la mu guardia civil; é la makiramdam karing panigapu
at sane lang manakit Iwa.
I Sisa, e na man sasaryan, atas no banwa ring kayang mata, at ing banwa makatiman ya king salang e mu apamalarawan; ding mapilan a maputing lulam kakawe la ketang malino asul. Tinuknang ya sinaguli ban pigila'na ing papampan galgal a magari king mabilug nang katawan.
Ding sundalus likwan de ing bale na at ila mu kabud: ala lang dekapan nune mu ing gaindung manuk a pataba’nang Sisa. Mengisnawa ya at myuman mika diwa.
"Kayapan da, at kayapan ding karelang puso!” nganang maybug kyak king tula.
Ding sundalus malyari reng silaban ing bale dapot pepaburen da la mung timawa ring kayang anak katmwa'na lang pasalamat.
Tinas nong myuman ding mata na, mipnung pasalamat king banwa a nung nu la lalabas susulagpo ring mapilan a tugak karing mangaimpis a lulam ning Pilipinas, at, pasibayung mika diwa king pusu, sindu na na ing kayang lakad.
Inyang milalapit ne karetang makatakut a tau, i’Sisa maglalawe ya misusumangid anti mong alang male at sangkan neng e akakit ing kayang manuk a gagaleuk manyawad saup. Halus milampas ya pamu king tulid da, bisa neng mulayi, dapot ing pamingat pinigil no ring kayang takbang.
E pa man binang mirayu inyang damdama'nang awsan deng magdalang bigsikan. Ginalgal ya, dapot anti mong alang balu, sindu na ing kayang lakad. Inaus deng pasibayu, dapot kaniti gilisakan da neng makiyabe palkara. Melikid ya, ala nang akarapat, maputla at gagalgal. Ing metung a guardia civil pipepya’ne king kayang gamat.
Linapit yang malagwa i'Sisa, mangasyas a dila king takut at malangi akmulan.
"Sabyan mu kekami ing tutu, o nung ali itali ra ka ketang dutung at barilan makatadwa!” ngana ning metung karela king siwalang babala.
Ing babai linawe ne ing dutung.
