Ketang kagutgutan a ita ing gobernadorcillo makalunus ya liwalan uling ala yang akarapat. Panaya'na namung tahimik lang dili ra.
Ing capitan ding pulis minyawad yang amanu at pepayntulutan de dapot e ya migsalita kataya man at linukluk yang pasibayu, makamulala at marine.
Salamat na mu tinalakad ya i'Don Valentin, ing matwang e naman lubus sasalungat king bayung palakad at migsalita ya.
"E tamu malyaring apyanan ing munikala ning tininti mayul uling mengapalalu. Karing dakal a bomba, dakal a benging moru-moru, ding kayanakan ila mung mapad, anti mo ing tininti mayul a maki agyung magpuyat pilan bengi at e mangaklak damdam karing mangaragul a bombang sasabya'na. Kitang ku ing pamalak da ring marangal a taung tinagun keti at ila ngan e la makanayun king munikala nang Don Filipo. E pu makanyan . . .?”
"Makanyan pin, makanyan pin. . ngarang agnanagnan mekibat ding matwa’t anak. Ding anak metula lang dinamdam king sinabi na ning metung karing matwang kalaban da.
"Nanan ta la ring apat a hermano mayor? O ba't mo yugse ta na la kabud ding manuk, ding kapun at litsun king malating dayatan (Iago) ? Kayabangan ing sabyan da pa deng karatig-balen at ing apala ta pa kaybat, mangulasyun tamung kapitnang banwa! O naming masabal tamu kang Sila at karing romanos? Kimbiran da na katamu misan mu man king pista ra? Aku, angga ngeni kening idad kung ini e ku atatandanan ing kimbira da na ku.”
"Ding romanu ati’lu Roma, nung nu ya karin ing Papa ...” nganang minulung Capitan Basilio.
"Ah! ngeni balu ku na! Ing Papa gagawa'nang panaun ning pamangiling ing pista ra karin inya paugse na king dayatmalat itang anggang sidya ra bilang pamagkulasyun at kaniti e la makarapat pamikasala. Nanu man ita, ing munikala yu e malyaring matanggap, e ta agawa uling metung a kamulangan!”
I'Don Filipo inurung ne ing munikala na uling selang-sangan deng matalik.
Ding mangatwa, ngening ikit deng mibagsak ing maigpit dang kalaban, e no meligalig inyang akit deng
