pangpang ning ilug at mengalap yang paku uling balu
nang buri na ning cura ing ensaladang paku. Sinulud
ne ing peka masanting nang imalan, pintuka'ne ing
salikap, e na ne ginising man ing anak na, minta ne
king kabalenan.
Makakalale yang papanik king eran, makiramdam mayap magkang atin yang damdaman a siwalang kakilala na, matarling, at siwalang anak.
Dapot ala yang dimdam at ala yang ikit, inya linub ya king kusina.
Karin, liningun ya balang suluk. Ding utusan at munisilyus tinggap deng alang gana. Pigaya'na la at halus e re pekibatan.
E na penamdaman ita at nganang kinutang:
"Nu ko malyaring ibili rening gule. . .?”
"Karin, maski nu karin ken. . .?” nganing kusineru. E no man halus belikdan at susulung na ing obra na. Puputputa’ne ing manuk a kapun. Selasa’nong Sisa ring darala na babo ning mesa: ding balasenas, ding apalya, patola at ing malagung paku. Kaybat timpak no babo ring sampaga. Lepita'neng makatiman ing metung a utusan a ukula’nang maganaka kesa king kusineru :
"Malyari kung makisabi king Among?”
"Ing Amung masakit ya. . nganang mekibat mayna.
"O i'Crispin.. .? Ala yu kaya king sakristya?” Ing utusan linawe neng misdan.
"I'Crispin...?” nganang kinutang makakulurun a kile. "Ala yu keta kekayo? Bah! e ko maglaram. .
"I’Basilio yang atyu keta bale dapot i'Crispin melakwan ya keti.” nganang Sisa. "Buri keng akit. .
“Melakwan ya pin sana dapot... tinakas ya, at dakal ya penako. Tibura’naku ngening abak ning Amung keta king kwartil ba’keng isumbung karing Guardia Civil. Marahil pintalan da no kanyan ding anak keta kekayu.”
Tikpa'nong Sisa ring balugbug na, ngenga ne ing asbuk na dapot gagalgal la ring labi na at alang katning lulwal.
