“Ale, ale, e ko sukat mibungil uli na mu ning bigak, kapatad! Atin lang babye alimbawa kekatamu ring Banal a Kasulatan (Santas Escrituras) dikil kaniti. Ding e maniwala (herejes) at ding prptestanti e re pekipaten ing Ginu tang Jesucristo bista man inugse no king ilug ding kabuntun a babing bandi ra, at itamu, kristyanus ta pa at makayanib king Kapataran ning Santisimo Rosario, mibungil ta mu king uli na ning metung a bigak? Nanung sabyan da kekatamu ring kekatang kaligligan, ding makayanib king Hermanos Terceros?”
Tinuknang la ring sabla at pigmulalan da ing malalam nang belwan ning guru at pigaganaka ra ing tatsan dala ring kasumangid a kapataran. Ing guru ulin? ikit nong agad memintu meganaka ya tonu at nganang tinuglung:
“Penandit kanyan payaus na na katamu ning cura. Sabyan yu na kaya nung ninu ing pilinan tang manaral karing atlung sinabi na: ing Padre Damaso, ing Padre Martin o ing paring kasaup na (coadjutor)” nganang sinabing Juana.
"Sus. . .! King e byasang manaral ing kadwa na ning cura," nganang Sipa. "Maya’pa i’Padre Martin.” "Nanan ye i’Padre Martin.. .? Mayna ya siwala. Maya’pa sang i’Padre Damaso.”
"Oyan, alintana yan,” nganang masikan Rufa. "Yan byasa yang manaral, mengari yang kumidyantis, ya na yan!”
"O neng e ta ya ayntindyan. ..” nganang minulung Juana.
"Uling mangalalam ing sasabya’na. Byasa ya sang manaral..
Dinatang ya i’Sisa, mamuntuk yang salikap, pigaya'no ring babai at melaus yang menik.
"Ita menik ya, manik tamu mu naman!” ngara.
Kakarug ya salu i’Sisa kabang papanik ya king eran. E na balu ing sabya’na king pari ba'nang ampatan ing mwa na at e na balu ing sangkan a sabyan na ba’yang mamilatan king anak na. Itang abak a ita, galingaldo pa tinipa ne king mula at pinupul no ring peka-malagu nang gule at lila’no king salikap nang sepinan bulung-sagin a maki bulaklak. Minta ya king
