“Talagang e na man sukat pagmulalan ing mayan kung tumipun kapatawaran (indulgencia) nung kekayu mu. Halus malyari kung sabyan ing agyang matudtud ku mu manikwa kung kapatawaran.”
“O nanu mong daraptan yu kareng kapatawaran a ren. . .?” ngarang agnan-agnan kinutang ding apat o limang manang. “Pues aku. . .” nganang migmayabang ning lalaki. “Panugse ku la mu keni’t keta...!” “Ah! kanyan, e ra ko malyaring puryan, maestro (guru)!” nganang tinutul Rufa. "Manabu ko king Purgatorio nung sasayangan yong makanyan ding kapatawaran. Balu yu pin, king balang amanung alang kabaldugan katimbang yang apat apulung aldo parusa king api, ngana pin ning cura; king balang damak a sinulad a inakse yu, anam namang pulung aldo ; balang kapatak a danum, adwang pulung aldo. Alang kapilisyan manabu ko king Purgatorio!”
“Aku nang bala kanita. Balu kung ligtasan!” nganing kapatad a Pedro, alang karug salu nanu man. "King karakal da na ring kaladwang linigtas ku king ape! Karakal da ring meging santu king uli ,ko! Subali pa, potang maginghalu na ku (in articulo mortis) malyari ku pang numabang, nung bisa ku, anggang pitu pang ganap a kapatawaran (indulgencias plenarias) at agyang mamamate na ku, makapagligtas ku pang kaladwa.”
Kasabi niti, meko yang magmaragul.
“Makanyan man, daptan yu sana ing daraptan ku. Lon yu: alimbawa, mika pabanwa kung kapatawaran (indulgencia) ilista ke yan king kwadernu ku. Kaybat, ngakung manigapu : Oh! mapalad a Padre Señor Santo Domingo utang a lub pu, ilawe yu na ku mong metung a kaladwa king Purgatorio a mangaylangan pabanwang kapatawaran, (indulgencia) ita sanang metung mung aldo e mimigit at e kukulang. Kaybat mag-kare-krus (cara y cruz) ku. Nung cara ya, ala. Nung cruz ya, atin at ilista keng pemayad ku king metung a kaladwa. King anti kaniting paralan makatipun kung dina-dinalan a banwang kapatawaran a masalang makakwenta. Sayang na! Nung kwalta la rening atipun kung kapatawaran, karakal ku aybye patubwan! Karakal da
