“Pepamisa ye ing meangubye yung asawa anti mo ing inusuk ku napon...?”
“Ali ke..!” nganang mayling mekibat ning matwa.
“Sayang na. ..!” nganang mipasyo manamdaman ning babai. "Sabi ra angga bukas timawa lang lipolipo ring kaladwang manaya king pangadi ra ding mabye, at ngara pa, ing misa king panaun at iti katimbang yang lima kanyang misa king aliwang aldo ning pabanwa at malyaring katimbang ya pang anam, ngana ping cura nanding abak.”
“O nung makanyan, e kasi atin ta pang panaun managal king grasyang pagkalub na ning aldo ite . . .?”
“Dapot, Doray,” nganang sinalabat Don Filipo, “balu mu nang i’Don Anastacio e maniwala king purgatorio . .”
“E ku maniwala. . .?" nganang tinutul mipatalakad ning matwa. "King atin kung ditak a kamalayan king istorya na niyan . . .”
“King istorya ning purgatorio .. .?” ngarang mipamulala ding myasawa. "Ale namo, isalita yu ne kekame...”
“Aba...! e ye balu istorya ing Purgatorio at saka ko papamisa at sasabyan yu pa ing kasakita'na... ? O dale, anti ning minuran murin at balamu maglwat yan samantalanan ta iting penandit ba'tang e maynip...” Minisip ya sinaguli ing matwang Tasio.
I'Don Filipo tiklip ne ing tatalna'nang libru. King siping na linukluk ya i'Doray a makasadyang e maniwala king nanu mang isalita na. Oyni ing mula ning istorya ning matwa.
"Ing Purgatorio ati na yu malwat pa bayu ya makisalamuha king ketawan ing Ginu Tang Jesucristu makabili ya libutad ning yatu agpang kang Padre Girard. Ing lugal a nung nu ya karin aliwa ya ing maragul a bage. Ngeni, ngaku namang kukutang: Ninu ring mananangnang ketang aping mikakalabkab ibat king kamumula'ning yatu . . .? King ating Purgatorio ibat pa king ibat patutwa'na ning Filosofia cristiana a sasabi king ing Dyos ala neng lelangan a nanu mang bayu kaybat nang pepaynawa.”
