"Nanu ing babasan mu keng aklat a yan. ..?
nganang Tasiu king makatando at tatalan libru.
“Aklat ya king salukuyan: ing kasakitan a daralanan da ring maldang kaladwa king purgatoriu...!” nganang mayling mekibat ning kitnan.
“Dyaske . . . dyaske . . . nganang sasabi ning matwa kabang papanik ya. “Ing sinulat keng aklat a yan sukat yang byasa...”
Kapanik na babo malugud neng selubungan ning lalaki at ning makibale na. Ing lagyu ning lalaki Don Filipo Lino at ing babai, Doña Teodora Vina. I’Don Filipo ya ing tininti ning balen at lider na ning metung karing partidung makatalakad — ing partido Liberal, nung malyari meng awsan makanyan, nung malyaring mika partidu karing sibabalen keti Pilipinas.
“E ye ikit king sementeryu ing anak nang kaybatibat Europa ning meangubye Don Rafael . . .?”
“Wa, ikit ke inyang kukuldas ya king sekya’na.”
“Ngara, mine ya karin ba’neng panintunan ing pikutkuta’nang igpa na. Kasakit na yata ning penandama’na kabud abalu na ing depat da. ..”
Ing filósofo tinas no ring pago na.
"E ko manamdaman king milyare. . .?” nganang kinutang ning babai.
"Balu yu pin, metung ku karing anam a mekipatnugut inyang ikutkut de. Aku ing mekikit king Capitan General inyang apagumasdan kung ding sabla angga na ring makiyupaya kakwanan da king alang bulad itang alang lagyung kalapastanganan king mete, bista't aku e ku penugalyan ing parangalan ke ing taung mayap potang mete ne nune kabang mabye ya.”
"Dapot, ginang, aku e ku makanayun king pamanyakup dang simamanan ding arian. King uli ning ditak a dayang intsik a minana ku kang indu ku, ating kung ditak a pamisip maka-intsik: nung parangalan ke ing igpa iti uli na ning anak at aliwa ing anak king uli ning igpa. Ing galal o parusa mangayntulid ya king dapat na ning sikakatau, at e uli ning depat da ring aliwa...”
Inaliwa ning babai ing pisasabyan at nganang kiuutang king filosofo:
