—No kasta, yegyo kaniak ti pagtugkelan, —kinuna ni Crisostomo nga immisem.
—Saludsudek: ?“Naimbagto ngata ti banagen ti agdama nga ipagpagnak?”
—¡Naglaad a saludsod daytan! —kinuna ni Sinang.
Ni Ibarra timmugkel, ket kas ti bilang a natuduna, inda kinita ti sungbat na:
—“¡Dagiti tagtagainep, tagtagainep da”, inbasa ni Albino.
Ni Ibarra innalana ti telegrama, ket linukatanna a sipipigerger.
—¡Ita ket di, nagulbod ti pagbasaan yo!—kinunana a sipupunno iti ragsak. —¡Basaenyo!
Ti gakat ti pagadalan naannamongan; ti ringgor inabakmo.
—¿Ania ti kayulugan daytoy?—sinaludsudda kenkuana.
—¿Dikay met kuna itay a magunggunaan ti maka-gun-od iti kasayaatan a sungbat?—sinaludsudna, a timekna ti namigerger iti rag-o, ket inna pinaggudua a si-annad ti papel.
—!Wen!, !wen!
— !Ala wen, iso daytoy ti bagik a ited, —kinunana ket intedna ken Maria Clara ti kagudua ti papel; —mangipatakderak iti uneg ti ili iti maysa a pagadalan dagiti ububbing a lallaki ken babbai; daytoy a pagadalan iso ti ipaayko a gungguna!
-—Ket dayta maysa a kagudua, ¿ania ti kayatna a sawen?
—¡Toy ipaayko met iti makaala iti kadaksan a sungbat!
—¡Siak! !no kasta, kukuak!—inpukkaw ni Sinang.
Ni Ibarra intedna ti papel ket nagdardaras a immadayo.
—Ket toy, dania ti kayatna a sawen?
Ngem daydi nagasat a bumaro nakaadayon ket inna manen sinublian ti ay-ayam da nga ajedres.
Ni Fray Salvi immasideg a kasla sabali ti yan ti riknana iti naragsak a tallaong dagiti babbaro ken babbalasang. Ni Maria Clara punpunasenna ti maysa a lua a limbuak kadagiti matmatana a gapo iti ragsakna.
Simmardeng ti kat-katawa ket nagumel dagiti sarsarita. Ti kura kitkitaenna dagiti babbaro ken babbalasang a dina man ket ammo ti inna ibaga; dagitoy ur-urayenda met nga agsao ket nagulimekda.
—¿Ania daytoy?—nabalinna idi agangay a nasaludsod, ket innalana ti pagbasaan a inna linukiblukib.
—Ti Ligay ni Gasat, maysa a pagbasaan a pagay-ayaman,—insungbat ni Leon.
