This page has been proofread.
16
ᎠᏂᏣᎳᎩ ᏧᎾᎴᏅᏙᏗ ᏧᎾᏕᎶᏆᏍᏗ.
ᎠᎴ ᏠᎨᏏ ᏙᎩᏓᎷᎦᏁᎰᎢ. ᎤᏁᎳᏅᎯᏍᎩᏂ ᎢᎩᏁᎸ ᎢᏓᏓᏅᏖᏍᎬᏉ ᎢᏗᏛᏁᏗᏱ ᏂᎦᎥ ᎡᎶᎯ ᏤᎿᎠ, ᎪᎱᏍᏗ ᏗᏛᏙᏗᏱ, ᎥᏝᏍᎩᏂᏃᏅ ᏗᏗᎩᎸᏗᏱᏉ ᏱᎩᏍᎪᎸᏓᏁᎸ. “ᎤᏓᏙᎵᏣᏘ ᏴᏫ ᎠᎦᏌᏯᏍᏗᏍᎪ ᎬᏅ ᎪᎱᏍᏗ ᎤᎾᏝᎥᎢ,” ᎠᏗᎭ ᎤᏁᎳᏅᎯ. ᎥᏝ ᏱᎬᏆᏚᎵ ᎩᎶ ᎤᏣᏘ ᎣᎩᎾᎵᎢᏗᏍᏗᏱ ᏱᏥᎪᎥ ᏂᎦᏙᎵᎬᎾᏉ ᏱᎦᎸᏂᎭ ᏐᏈᎵ ᎤᎾᏝᎥᎢ. ᎥᏝ ᎣᏏ ᏱᎬᎩᏰᎸ ᎪᎱᏍᏗ ᏥᏯᏛᏁᎯ ᏱᎩ, ᎠᎴ ᎾᏍᏉ ᎡᏙᏓᏉ ᏱᎩ. ᎾᏍᎩᏉ ᎯᎠ ᏱᏄᏩᎿᏕᎦ ᎤᎾᏝᎾᎥ ᎾᏍᏉ ᎤᏲᏉ ᎢᏗᎬᏩᏁᏗ ᏧᏅᏏᏓᏍᏗ, ᎠᎴ ᎾᏍᏉ ᎤᏓᎵᎢᏉ ᎠᎴ ᏧᏪᏥ ᎤᏲᏉ ᎢᏗᎬᏩᏁᏗ.
ᎠᏉ ᎦᏙᎦ ᎤᏣᏘ ᎤᏬᏚᎯᏳ ᏐᏈᎵ ᎢᎾᎨ ᎡᎯ. ᎥᏝ ᏐᏈᎵᏯ ᏥᏂᎬ ᎢᎩᏛ ᏱᎩ, ᎠᏎᏃ ᎤᏟ ᏄᏬᏚᎭ. ᎠᎴ ᎬᏂᎦᎵᏍᏗᏳ ᎤᏣᏘ, ᎠᎴ ᎤᎶᏒᏍᏔᏅᎯ ᎬᏘᏌᏔ. ᏗᎧᏃᏗᏱ ᎤᏁᎩᏳ ᎬᎿᎨᏃ ᏕᎤᎶᎸᏗ ᎠᏰᎸᎢ ᏂᎬᎢ. ᏍᎪᏂᏱ ᎤᏩᏒ ᏗᏁᎭ ᎤᏣᏘ ᏧᏗᎴᎬᎢ, ᎠᏂᎬᎿᎨᏍᏛᏱ ᏣᎾᏗᏍᎪᎢ. ᎤᏎᎦᏨᎯ ᎠᏥᏂᏴᎰ ᏂᎦᎥ ᎬᏘᏌᏔ. ᎥᏝ ᎪᎱᏍᏗ ᎬᏙᏗ ᏱᎩ ᎤᏬᏚᏒ ᎤᏩᏒ—ᏯᏏᎾᎯᏍᏔᏅᎨᏃᏅ ᎣᏍᏛ ᎬᎩᎸᏙᏗ ᏱᎩ.
