Page:Charles Lamy - poèmes en patois Kimberlot.djvu/29

From Wikisource
Jump to navigation Jump to search
This page has not been proofread.


106 ........................... SOT PÈRE


Et pour dire m’ pinsé’ d’qu’au fond,
Aprés qu’Azette m’a fait in baise,
Comme y n’ a qu’ chés mioch’ là qu’ in font,
Arot-elle été pus mauvaise,


Je l' pardonne et n’ peut m’impêcher
D’ voloir qu’a n'in faich’ qu’à s’ cervelle
Pou qu’a r’vienche au mêm’ prix r’chercher
Min douch’ pardon de s’ fautt' nouvelle.


Pis quind in est bon dins ch’ bon coin,
Surtout bon sins carcul, sins pose,
Ejou qu’in n’éprouv’ pont l' bésoin
D’avoir quiér et d’ gater queuq’ cose ?


Et dins cheull’ mason sins marmot,
Chez ch’ viux garchon ou chez l’ viell’ fille
N’ a toudis eun’ biête au bas mot
Miux sogné’ qu'eun’ personne utile.


Aussi min saing y n’ fait qu’in tour
A vir des papas sins tindresse,
Chouler, crier eun’ tiote amour
Bonne à couvrir d’ baise et d’ caresse.


Ch’est toutt’ je n’ veux mi’ vos lasser,
Pouleur in peut m’ traiter d’ sot père.
Azette attind pou m’imbrasser
Jou que j’ saros m’ mette in colére ?


————