This page has not been proofread.
- SOT PÈRE
- ————
- Azette a six ains d’puis l'autt’ jour,
- Aveuc l'idé’ qu’ cha s’ra l’ derniére
- Je l' trouve aussi bell’ qu’in amour
- Et m’ fêmme n’n’est incor pus fière.
- A peine aussi hautt’ que ch’ ramon,
- J’ m'attinds qu’ dins m’ tasse j’ porros l' mette,
- Maginez-vous que ch’ biau démon
- A no mason est dev’nu ch’ maîte.
- A sin graind frèr’ qu’est sin parrain,
- Aux autt’ et s’ ma tainte s’ marraine,
- Méme à nous deux quind cha li prind
- All’ donn’ des ordr’ tout comme eun’ reine.
- Et l' premier qui veut l' dépiter
- S’ met à dos tout l' ress’ de l’ famille,
- Sitôt qu’a qu’minche à raconter
- Y faut s’ taire et d'mourer trainquille.
- Ch’est de ch’ cop qu’in n'intind du biau !
- All' veut parler vite et berdoulle,
- N’ sait pus, se r’prind, comme in osiau
- Imitaint ch’ l'air qu’in autt' gazoulle.
- A m’ dit qu’awi, je n’ dis point non.
- Et, fort souvint, quind je l' proméne,
- Faut l’l’acouter m’ faire un sermon
- Pou que j’ m’in voch’ par u qu’a m’ méne.
