This page has been proofread.
102 ........................... VISIONS
- Dins ch' biau café qui vos attire,
- Courez boire l' mitain de ch'mos
- Utile à vo fêmm', pauv' martyre,
- Qui n' sait pus qu'mint boucher chés tros.
- Ch'est qu' si marchaint dins chés drotures
- Vos laichottent d' côté ch' café,
- Qui qu' ch'est qui parot chés dorures,
- Marbr', glach' et tint d' frais qu'in y fait?
- Qui qu' ch'est qu'arot l'joie et l' délire
- D' savoir qu'in râflaint vos gros sous
- Au bout d' peu d' timps ch' caf'tier se r'tire
- Vive d' ses rintt' in s' moquaint d' vous ?
- Mais comm' dins s' bonté de v'nir in aide
- A ch' l'homme autaint qu'à ch' l'animal,
- L' Créateur a plaché le r'mède
- Qu' l'homme a besoin pou guérir sin mal,
- Au monmint ou chacun s' figure
- Qu'y n'a pus rien pour arrêter
- Ch' l'homme d' rouler su ch' mont d'ordure
- D'ù l' passion d' boir' s' plait à l' jéter,
- Pindaint que ch' bon monne s' désole,
- Que ch' malin rit à tout casser,
- D' pus belle ch' vaillant maîtr' d'école
- Apprind à lire, ouvrer, pinser,
- A tous chés tiots infaints de s' classe
- Et pa d' bons consels les rind forts
- Pou qu' pus tard y n' suiv'tent point l' trace
- Pavé' d' soulards et d'ivres-morts.
