This page has been proofread.
100 ........................... VISIONS
- TROISIÈME PARTIE
- D'puis l' tourmint d'eun' ville arrêtée
- In plein progrès pa ch' gueux d' poison
- Et d'eun' population portée
- D' n'in boir' pus qu' jinmais sins raison,
- D'puis qu'in avot vu sins surprise
- Comme ch' père ch' fiu fair' parel,
- Car ch' méchaint eximpe à pus d' prise
- Su ch' tiot qu' n'importt' qué bon consel.
- Combin d' fos l' même heure est r'venue,
- D'zous ch' pont combin n'a passé d'iau,
- Combin d' fos cheull' moisson guernue
- A donné du blé plein ch' boisseau ?
- Combin par chés drots su ch' l'eau d' vie
- Cheull' ville a récolté d' millions,
- Combin d' gins tués pa l' maladie
- Et d'honnêtt' dev'nus d' pir' soullions ?
- A l' fin qui qu' ch'est à même d' dire
- L' nombe d' cheux que ch' vice a ruiné
- D' sainté, d'écus et l' pir' du pire
- Réduit à tout, guillotiné ?
- Mais porquoi r'wêttier in arrière,
- Vu qu' ch'est d' l'avaint qu' y faut aller,
- Jou que ch' ruissiau, jou qu' cheull' rivière
- In r'montaint porrottent couler ?
