lugar ipag-ogma can magna banuaan,
iyong nagsalihid labing cahandalan.
!Oh, cagnalasgnalas na di co maisip
an casoripotan halangcao na lagnit!
lugar caogmahan sa banuang Camalig,
magna camondoan iyong nagsalihid.
Na siring man sana sa banuang Tabaco,
gayac nang totoo sa pag-ogmang bio;
sa horas na idto panaling nasocro,
an sa honahona nin manarosaro.
An si isay pa man na tauong may boot,
tinodcan nin handal sa paghorophorop;
huli ta dai pa desde cadtong enot
naquita an siring magna alopo-op.
Pagtaléan logod nin macacabasa
an ipag-oosip na sarong historia,
huli cadtong siring na magna padusa
caiyan calagnitan na ipinaquita.
Cadtong cahaponon aldao na Miércoles,
fechang sinabi na visperas mayores,
iyo man an poon pagcolop nin buquid
casabay an tanog nagnagnalota-it.
Alagad dai pa labing nahahandal
ibang magna tauo pahayag na senial,
huli ta tood na magna taga duman,
tinanog na siring, may pira nang aldao.
Condi gnani cadto nin si na mamidbid,
pag-oran nin abo may gapong saradit;
iyo nang pag-orog nin magna paghadit
cadtong ibang tauo na may pacabatid
Asin ta nagdagdag magna cahandalan
nin nagnagmamasid sa hiro nin Volcan,
nin huli sa color, dagom na naglatao
may azul, may verde sa Libog an pucan.
