BĂBOEROEGHĂN ANA-BĂRNA.
1
SENNENG GHI' KANA'NA, SOSSA BILA LA TOWANA.
Băḍă Bădhăna bhăngsa aghoeng kasorang anḍi' ana' lalake' kasorang, anjama Radhin Bhaghoes 'Abdoella, talèbăt bhăghoes robăna, sarta sapola tèngkana njennengngaghi ka orèng. Rama-èbhoena talèbat lèboer nèser ka abă'na. Sakèngḍări talèbăddhă nèser, sabhărăng karep ban pamèntana paḍă ètorotè.
Abă'na èpamellèaghi èn-maènan bădhălăn bără' amatjemmatjem, opama: ḍhăng-peḍḍhăngan, pan-sanapanan, poer-seppoeran, pè-topèan, boer-tamboerăn, orgel băn èn-laènna.
Sarrèna aba'na ana'na pardjadji bhăngsa aghoeng sè èkanèserrè, dhăddhi èmellèaghi angghoej sè ghoes-bhaghoes, kongsè angghoejjă rèn-arènna bănnja' sè ngangghoej emmas ènten. Pangakanna èkennèng kotja' taḍă' băktona, sarat taḍă' amboena akaèl; apa polè mon èntar èn-maènan mosṭè asango kakanan, opama: biskoewit, sokklat băn èn-laènna. Maskè la bărijă ghi' asango pèssè, mènangka kabellina kakanan; è rè-saarèna ta' tjokop 10 sèn.
Sabbhăn sar-asar mabă abă'na èntar lăn-djhalănan nompa’ ta'-rata'an èèrèt orèng otabă embi' Manggălă otabă djhărăn boedjhil, sarta èèrèng bi boe’-embhăn băn pan-bărămpan pangèrèngnga, sè lakar èpantjè abhărengngè abă’na èn-maènan.
Băbătekka Ghoes Doella rèja tèbbhir, ta' pardoeliăn sarta korang tè-ngatè. En-maènanna sè ghoes-bhăghoes băn sè rang-larang kabellina ghellă' nèng èangghoej saarè ḍoe arè la rosak pas èboewăng, terros ta' èpardoeli, bhăb angghoejjă ijă bărijă kèja. Rama-èbhoena ta' băngal ro-ngaro sakalè, sabăb abǎ'na tjè' ḍhoesonna. Abă'na tjè' bhengngèssa ka reng-bhǎrengnga, tapè lenḍhă'ăn; è rè-saarèna reng-bhărengnga djărèja paḍă èberri'i kakanan sè man-njaman, sarta sambi èberri'i pèssè, èsoro kabelli kakanan laèn. Amarghă djărèja abă'na talèbăt èkalèboeri bi' reng-bhărengnga ghellǎ'.
Băn polè Ghoes Doella rèja tjè' lèboerră ka lem-alemma orèng; pa'-sapa'a sè tao ngala' atè, sarta djoeng-mondjoeng ka abǎ'na, tanto pas èberri'i bhărăng sè èkaterroè.
Sabbhăn boelăn Powasa taḍă' amboena ngotjol lèng-tjè èngan bàn băngapi. Sakèng bănnjana sè èotjol, eḍalem boelăn djarèja rèng towana sè mellèaghi tjol-otjolan ghellǎ' taker abi' ƒ50.
Băboeroeghan ana-bărna
| 1 |
