Rintrez. Rintrez, vous occupez pos du prix, ch’est mi qui paie; on n’ se mari pos tous les jours.
Vraimint, monéonque, d'puis c’ matin vous nous faites marcher d’ surprise in surprise.
Sitôt qu’ vous avez été marié, vous nous imm'nez in voiture faire eine prom’nate au villache et vous nous faites servir ein déjeuner su’ l' pouce, à 3 heures, vous nous ram'nez in ville et vous nous conduisez à l'hôtel faire ein banquet comme j' n'ai pos mémoire d'in avoir jamés fét ein pareil.
A siept heures, vous nous faites monter in qu'mint d’ fier, in nous obligeant à vous accompagner ichi à Lille pour vo’ voyache de noce.
Et vous n’ nous avez pas cor' laisser payer rien qu’ che soit, ch'est vraimint tréop d’ politesse et surtout tréop d' prodigalité à no’ n'égard.
Je n' pouvéos pos mieux faire pour vous ormercier d' l'obligeance que vous avez eu de m’ servir de témouan.
In tous cas, monéonque, vous avez vraimint bien fét les cosses.
Quand on est heureux, on orwaitte à rien; … assiéons-nous et nous alléons printe eine séquoi.
- (I's mettent leu valisse à tierre et s'assitent à l' première table côté gardin).
Je n' sés pos si ch'est les trois quate sortes d' vins qu'on nous à servi in deinnant, ou bin l’ caot’mint du train, més j'ai eine soif à vider cherque et toniéau.
Attindez, Tavie, j' vas crier aprés l' garchéon et li d'mander d' quoi vous désaltérer. Garchéon!
