Siya maoy usa ka pilipinhon nga higala sa mga katsila ug tinamod sa mga Punoan sa lungsod ug sa mga dagkong tawo sa lalawigan; dili na lang tungod sa iyang mga katigayonan, kong dili, tungod sa iyang kaligdong ug pagkamaalam.
Batan-on pa siya kaayo nagasugod na sa pagkupot mga dagkong katungdanan sa lungsod, maingon sa pagka Ginhaupan, Magtutoon, Gobernadorcillo, Capitan Municipal, Maghuhukom sa Kadaitan, Jefe Local ugb., mga katungdanan nga nadala niya sa pagkamatarong ang iyang lungsod sa X.
Mahatungod sa iyang mga banhandi, makaingon kita nga usa ka dakong bahin sa kapatagan sa T. ug sa kabungtoran sa X. nga tinamnan sa libo ka libo ka punong lubi, mga katubhan, mais, humay, tabako, magay, abaka, saging, mangga ugb. si Don Juan mao ang tagiya. Kong ilakip ta ang iyang mga dagkong asinan ug mga dili maisip nga sakayan nga makalubog sa kadagatan kong managpanggikan sa dungguanan, makaingon kita nga siya maora gayod ang dato sa tanan nga managpuyo sa kasadpan sa lalawigan sa Sugbo. Ang kadaghanan ning mga bahandi nga katingalahan nasunod niya sa iyang mga katigulangan ug ang uban iya nang pinangitaan sa sulod sa iyang walay pu-as nga pagpamunoan.
Kong dunay lungsod nga magasaulog sa pangilin sa iyang Patron, ang unahon sa pagdapit, mao si Don Juan, niadtong mga salapiang sugarol sa baraha ug bulang sa mga kalungsuran sa Negros ug Panay. Inig-abot niya sa mga lungsod nga nagdapit kaniya ginasugat siya sa daghang tawo nga managdalag panuni ug managpabutó sa mga luthang
4
